Türkiyədə son 3 ildə zirvəni əldən verməyən ''Qalatasaray''ın yeni mövsümlə bağlı transfer planı yavaş-yavaş bəlli olmağa başlayır.

"Football-plus.az" xəbər verir ki, Viktor Osimhenin məsələsinə rəsmi olaraq hələ nöqtə qoyulmasa da, onun ''Cim-Bom''da qalmaq ehtimalı demək olar, yoxdu.

Türkiyə mətbuatının yazdığına inansaq, baş məşqçi Okan Burukun qərarı ilə 6 futbolçu ilə bu yay yollar ayrılacaq. Söhbət Elias Yelert, Karlos Kuesta, Pşemislav Frankovski, Nikolo Zanyolo, Viktor Nelsson və Derrik Köndən gedir. Son 3 futbolçu zatən geridə qoyduğumuz mövsümü başqa klublarda icarədə tamamlamışdı.

Zanyolo ikinci dövrəni ''Fiorentina''da, Nelsson ''Roma''da, Kön ''Verder''də keçirmişdi. Maraqlıdı ki, ilk 3 futbolçu isə ''Qalatasaray''a yeni gələnlərdi. Yelert ötən yay, Kuesta ilə Frankovski isə qışda transfer edilmişdi. Özü də bu 3 futbolçuya görə ümumilikdə 25 milyon avrodan çox pul ödənilib!

Bundan başqa Çempionlar Liqasında da uğurlu çıxış etmək istəyən Okan Buruk komandanı tərk edən Fernando Muslera və Dris Mertensin yerinə həmin mövqelərə dünya səviyyəli isimlərin alınmasını istəyib.

Məşqçinin fikrincə, bu mövqelər çox böyük önəm kəsb edir və bura alınacaq futbolçular heç kimdə şübhə dogurmamalıdı. Ona görə də ''Eyüpspor''un qapıçısı Berke Özəri, PAOK-un qapıçısı Dominik Kotarskini, eləcə də Zaqreb ''Dinamo''su və Xorvatiya yığmasının gənc ulduzu Martin Baturinanı çox güman, ''Qalatasaray''da görməyəcəyik.