Superliqada əmin addımlarla növbəti çempionluğuna doğru irəliləyən ''Qalatasaray''ın icarədə olan futbolcuların satışından pul qazanmaq planı böyük ehtimalla baş tutmayacaq.

''Football-plus.az'' xəbər verir ki, söhbət ''Fiorentina''da çıxış edən Nikolo Zanyolo və ''Verder''in formasını geyən Derrik Köndən gedir.

Legioner limitində yer açmaq üçün İstanbul nəhəngi ötən yay hər iki futbolçunu icarəyə göndərmişdi. Onların hər ikisinin bu yay daimi əsasda satışı ''sarı-qırmızılar''a ümumilikdə 20,6 milyon avro qazandıra bilərdi. Ancaq nə ''Fiorentina'' Zanyolonu, nə də ''Verder'' Könü daimi əsasda transfer etmək niyyətindədi.

Ümumiyyətlə, Zanyolonun aqibəti maraq doğurur. Son 2 mövsümdə 3 fərqli klubda (Aston Villa, Atalanta, Fiorentina) icarə əsasında top qovmuş italiyalının yayda nə edəcəyi bilinmir. Bəzi mənbələr iddia edir ki, ''Qalatasaray'' çempion olaraq ÇL-in əsas mərhələsində oynamağa şans qazansa, Zanyolo yenidən İstanbul nəhənginə qayıdacaq.

Mövsümün sonu üçün planlaşdırılan 20 milyon avroluq gəlirdən məhrum olan ''Cim-Bom'' bu azmış kimi özü 15 milyon avro ödəmək məcburiyyətində qalacaq. Çünki hazırda klubda icarə əsasında çıxış edən İsmail Yakobs ilə Pşemislav Frankovskinin müqaviləsində mövsümün sonu üçün məcburi daimi transfer maddəsi var! Yakobsda bu məbləğ 8 milyon avroya, Frankovskidə 7 milyon avroya bərabərdi.

Maraqlısı odu ki, bu futbolçuların ümidlərini doğrultduğunu söyləmək çətindi. Okan Buruk müdafiənin sol cinahına qışda transfer edilən Ərən Elmalıdan razıdı. Mövsümün qalan hissəsində də Elmalının start heyətində oynayacağı gözlənilir. ''Beşiktaş''la derbidə qırmızı vərəqə almaqla ''Qalatasaray''ın bu mövsüm superliqada yaşadığı yeganə məğlubiyyətin əsas günahkarlarından olan Frankovskini də sağ cinahda Okan Burukun əsas silahı saymaq çətindi.

Təcrübəli məşqçinin qalan oyunlarda həmin cinahda Kaan Ayhana şans verəcəyi gözlənilir.