"Qalatasaray'' dünən toplanış üçün Avstriyaya yollandı.

"Football-plus.az" xəbər verir ki, Türkiyənin son çempionu burda qürbətçi fanatlar tərəfindən böyük izdihamla qarşılandı.

Qeyd edək ki, ötən mövsümü başqa klublarda icarədə keçirən 3 futbolçu Avstriyaya aparılmayıb. Söhbət Taylan Antalyalı, Oğulcan Çağlayan və Aleksandru Çikıldaudan gedir. Bu da o deməkdi ki, bu futbolçular yeni mövsüm üçün baş məşqçi Okan Burukun planlarına daxil deyil. Xüsusilə rumıniyalı Çikıldaunun yenidən icarəyə göndəriləcəyi demək olar, dəqiqdi. Amma əvəzində ötən mövsümü başqa klubda icarədə keçirmiş digər rumıniyalı futbolçu Olimpiu Morutsan Avstriyaya aparılıb. Buruk onu yenidən sınamaq istəyir. Morutsan ya heyətdə saxlanılacaq, ya da yaxşı qiymətə satılacaq. Bu futbolçuya İtaliyadan ciddi təkliflər var.

Maraqlıdı ki, ''Hall Siti'' ilə yoldaşlıq oyununda (3:4) zədələnərək 3 həftəliyə sıradan çıxan uruqvaylı yarımmüdafiəçi Lukas Torreyra da komanda ilə birlikdə toplanışa yollanıb.

Sonda qeyd edək ki, Avstriyada ümumilikdə 3 oyun keçirməyi planlaşdıran ''Qalatasaray'' ilk matçına sabah çıxacaq. Macarıstan təmsilçisi, son mövsümü 6-cı pillədə başa vuran ''Kişvarda'' ilə oyun Bakı vaxtı ilə saat 21.30-da başlayacaq.

ƏLİ