Heyətini gücləndirmək istəyən ''Beşiktaş'' diqqətini İspaniya ''bazarına'' yönəldib.

"Football-plus.az" xəbər verir ki, "ağ-qaralar'' ''Espanyol''lu Xavi Puado və ''Jirona''lı Yaser Asprilyanın rəsmiləri ilə danışıqlara başlayıblar.

Özü də Türkiyə mətbuatının yazdığına inansaq, başqan Sərdal Adalı danışıqlarda iştirak etmək üçün şəxsən İspaniyaya yollanıb.

Sol vinger mövqeyində çıxış edən Puadonun ''Espanyol'' ilə müqavilə müddəti başa çatıb. O hazırda sərbəst futbolçu statusunda təklifləri nəzərdən keçirir. 27 yaşlı futbolçuya ''Real Sosyedad'' ilə ''Atletiko'' da maraq göstərir. Digər tərəfdən ''Espanyol'' da ona yeni müqavilə təklif edib. Puadonun transfer dəyəri təxminən 8 milyon avro civarındadı. 2003-cü il təvəllüdlü Asprilya isə Kolumbiya futbolunun yeni ulduzlarından hesab olunur. Əsasən sağ vinger kimi oynasa da, digər cinahda və oyun qurucusu kimi də oynaya bilir.

Onun ''Jirona'' ilə 2030-cu ilə qədər müqaviləsi var. Kataloniyalılar bu futbolçunu ötən yay ''Uotford''dan 18 milyon avroya transfer ediblər. İstanbul nəhəngi Asprilyanı icarə əsasında heyətinə qatmaq istəyir.