''Beşiktaş'' həm cari mövsümün əvvəlində, həm də qış fasiləsində maraq göstərdiyi ''Ayaks''lı Stiven Bergeysi yayda heyətinə qatmaqda qərarlıdı.

Əsasən sağ vinger mövqeyində oynayan Bergeysin Rəşid Gezzalın yerinə transfer olunacağı gözlənilir. Gezzal ilə bu yay yollar ayrılacaq. Bergeysin ''Ayaks''la hələ birillik müqaviləsi olsa da, o, az oynadığı üçün Amsterdam nəhəngindən ayrılmaq istəyir. Türkiyə mətbuatının yazdığına inansaq, ''Beşiktaş''ın yönəticiləri Samet Aybaba ilə Feyyaz Uçar futbolçunun meneceri ilə görüşmək üçün Niderlanda yollanıblar. 32 yaşlı vinger ''Ayaks''da illik 2 milyon avro qazanır və həmin pulu ''Beşiktaş'' da ona təklif etməyə hazırdı. Bergeys yanvarda verdiyi açıqlamada ''Beşiktaş''ın ona maraq göstərməsindən xəbərdar olduğunu, amma hər şeyin yalnız ondan asılı olmadığını vurğulamışdı.

Qeyd edək ki, uzun illər ''Feyenoord''da çıxış edən və hətta son mövsümündə kapitan sarğısını da daşıyan Bergeysin 2021-ci ildə əzəli rəqib ''Ayaks''a transferi Niderlandda böyük qalmaqala və söz-söhbətlərə səbəb olmuşdu. Bergeys ilk 2 mövsümdə əsas heyət üzvü idi. Amma bu mövsüm həm ''Ayaks''da, həm də Niderland yığmasında gözdən düşüb. 2023/24-də onun aktivində 26 rəsmi oyunda 7 qol, 10 məhsuldar ötürmə var.

ƏLİ