Yeni mövsüm üçün ilk növbədə hücum xəttini gücləndirmək istəyən ''Beşiktaş'' digər tərəfdən qapıçı axtarışlarını da davam etdirir.

Ümumiyyətlə, belə görünür, bu yay hər üç İstanbul nəhəngi bir qapıçı transfer etməli olacaq. Çünki ''Qalatasaray'' Fernando Muslera ilə, ''Fənərbaxça'' Dominik Livakoviç ilə, ''Beşiktaş'' isə Ərsin Destanoğlu ilə vidalaşmağa hazırlaşır.

Düzdü, ''ağ-qaralar''da 36 yaşlı Mərt Günok birinci qapıçı statusunu qorumaqda davam edəcək. Amma rəhbərlik onunla əsas heyət uğrunda sağlam rəqabət apara biləcək bir qapıçı istəyir. Türkiyə mətbuatının yazdığına inansaq, ''qartal'' diqqətini ''Mançester Yunayted''in türkiyəli qapıçısı Altay Bayındıra yönəldib. ''Fənərbaxça''nın sabiq əlcək sahibinin transferinə baş məşqçi Ole Qunnar Sulşer də razılıq verib.

İddialara görə ''Beşiktaş'' ''Yunayted''ə 3 milyon avro təklif etsə də, manikunianlar ən azı 6 milyon avro tələb edir. Bu üzdən İstanbul nəhəngi icarə variantının üzərində düşünür. 27 yaşlı Altay İngiltərədə ikinci mövsümünü keçirməsinə baxmayaraq heç cür Andre Onananı əsas heyətdən sıxışdıra bilmir.

Bu mövsüm 9 rəsmi oyunda forma geyən və bunların yalnız 2-də qapısını toxunulmaz saxlayan Bayındırın transfer dəyəri 10 milyon avro civarındadı.