Mayın 20-dən 21-nə keçən gecə MHL-də konfrans finalları start götürdü. Xəbər verdiyimiz kimi, Qərb konfransının qalibi “Dallas” – “Edmonton”, Şərq konfransının qalibi isə “Karolina” – “Florida” seriyasında müəyyənləşəcək. İlk seriyada “Dallas” öndədi, ikincidə hesab bərabərdi.

Arxada qalan oyunlarla bağlı bəzi maraqlı məqamlar var. “Dallas” “Edmonton”la oyunun 2-ci periodundan sonra hesabda 1:3 geridə olsa da, 3-cü periodda inanılmazı bacardı, 5 cavabsız qol vurdu. Belə hadisə indiyə qədər Stenli kubokunun tarixində üç dəfə olmuşdu və 21-ci əsrdə təkrarlanmamışdı.

Maraqlıdı, bəs 21-ci əsrdə belə qəhrəmanlığı hansı komandalar bacarıb? “Cığıraçan” rolunu 1971-ci il aprelin 8-də “Boston”la oyunda geridönüş edən (7:5) “Monreal” oynayıb. 1982-ci aprelin 10-da keçirilən “Edmonton”la oyunda (6:5) “Los-Anceles”, 1984-cü il aprelin 28-də “Minnesota Nort Starz” ilə oyunda (8:5) isə “Edmonton” eyni qəhrəmanlığı bacarıb. Bütün bu hallarda 2-ci perioddan sonra geridə olan komandalar 3-cü periodda 5 cavabsız qol vurub. Onu da xatırladaq ki, 1967-ci ildə yaradılan “Minnesota Nort Starz” MHL-də çıxıb edib, hətta 1981 və 1991-ci ildərdə Stenli kubokunun finalına çıxıb. 1993-cü ildə Dallasa köçən klub “Dallas Staaz” adlanmağa başlayıb.

“Karolina” – “Florida” seriyası ilə bağlı da maraqlı məqam var. Bu oyunda 5:2 hesabıyla qalib gələn “Florida” cari pley-offun 8-ci səfər oyununda qol sayını 38-ə çatdırdı. “Panterz” “Kolorado”nun 2021/22 mövsümündə pley-offun 8 səfər oyunu üçün müəyyənləşdirdiyi məhsuldarlıq rekordunu təkrarladı.

İndi isə mübarizəni davam etdirən 4 komandanın Stenli kubokunu qazanmaq şansına toxunaq. “The Atletic” nəşrindən olan həmkarlarımız mövsümün qalibi ilə bağlı dəyərləndirmə aparıb. Onların fikrincə, “Dallas” – “Edmonton” seriyasında “ulduzlar”ın qələbə şansı 77,4 faizdi. O da qeyd olunur ki, bu seriyada, çox güman, mümkün 7 oyunun hamısı keçiriləcək. “Karolina” – “Florida” duelinə gəlincə, burda “pələnglər”in qələbə ehtimalı 61,2 faizlə dəyərləndirilir. Adı çəkilən nəşr bu seriyanın ən azı 6 oyuna qədər davam edəcəyini düşünür. Bəs Stenli kubokunu qazanmağa əsas namizəd kimdi? “The Atletic” “Dallas”ı (64,5 faiz) 1-ci yerdə göstərir. “Edmonton”un kuboku qazanmaq ehtimalı 22,6 faizdi. “Florida” ilə “Karolina”nın şansı (6,5) bərabərdi.

Bu arada “Toronto” rəsmi saytı vasitəsi ilə Brendan Şenahenin klub prezidenti postundan getdiyini elan edib. Klubun sahibləri 56 yaşlı kanadalı ilə müqavilə müddətini uzatmağı lazım bilməyib. Şenahen 2014-cü ilin yazından bəri “Toronto”nun prezidenti idi. Komanda bu müddətdə 9 dəfə MHL-in pley-offuna çıxıb və bir dəfə də 2-ci mərhələdən uzağa gedə bilməyib. “Toronto” mayın 19-da “Florida”ya seriyanın 7-ci oyununda uduzmaqla (1:6) Stenli kubokunda mübarizəni dayandırıb.

21 may
Karolina – Florida  2:5 (1:2, 0:1, 1:2)
Seriyada hesab – 0:1.

22 may
Dallas – Edmonton 6:3 (1:1, 0:2, 5:0)
Seriyada hesab – 1:0.

23 may
Karolina – Florida 0:5 (0:3, 0:1, 0:1)
Seriyada hesab – 0:2.