MHL-də 1/4 final mərhələsinin oyunları, yəni konfrans yarımfinalları keçirilir.

Şərq konfransının yarımfinalında “Toronto” ilə “Florida”, “Vaşinqton”la “Karolina” qarşılaşır. Qərbin yarımfinal cütləri isə belədi: “Vinnipeq” – “Dallas”, “Veqas” – “Edmonton”. Hələ ki heç bir cütdə mübarizə başa çatmayıb. Son bir həftədə keçirilən oyunlarla bağlı ən maraqlı məqamları nəzərinizə çatdırırıq.

“Toronto” “Florida” ilə seriyanın ilk oyununda 34-cü saniyədə hesabı açdı. Uilyam Nülander “Toronto”nun pley-offda çıxış tarixində 1951-ci ildən bəri ən erkən qolunu vurdu. Komanda həmin il Stenli kubokunun finalında (0:15), bir də 1922-ci ildəki MHL finalında (0:30) bundan daha tez fərqlənib.

“Vinnipeq”in forvardı Nino Niderrayter isə İsveçrə hokkeyinin tarixinə düşdü. 32 yaşlı hücumçu mayın 8-də “Dallas”a qarşı oynamaqla pley-offda 100 oyun həddinə çatan ilk isveçrəli oldu. Bu oyunda qolla yadda qalan Niderrayter həm də pley-offda 40 xal toplamağı bacaran 2-ci isveçrəlidi (birinci Roman Yossi olub).

“Karolina” – “Vaşinqton” seriyasında ilk üç oyundan sonra paytaxt klubu hesabda geri düşüb. Maraqlıdı ki, müntəzəm çempionatın qəhrəmanlarından olan Aleksandr Oveçkin bu üç oyunda bir xal da toplamayıb. Amma o, Stenli kuboku uğrunda 159 oyun keçirməklə bu göstəricidə rusiyalı hokkeyçilər arasında 4-cü pilləyə yüksəldi. Oveçkin hesabında 157 oyun olan Pavel Datsyuku geridə qoydu. Oyun sayına görə ilk üç pillədə isə Sergey Fyodorov (183), Yevgeni Malkin (177) və Sergey Zubov (164) qərarlaşıb.

Komanda uğurlarına gəlincə, ilk növbədə “Edmonton”un adını çəkməliyik. “Neftçilər” “Veqas”la seriyanın 2-ci oyununda hesabda geri düşsələr də, sonradan vəziyyəti dəyişməyi bacardılar. “Edmonton” pley-offda ardıcıl 6-cı əzmkar qələbəsini qazanmaqla MHL-in rekordunu yenilədi. “Edmonton” 1-ci mərhələdə “Los-Anceles”i 4, 2-ci mərhələdə isə “Veqas”ı 2 oyunda məhz bu şəkildə məğlub edib.

6 may
Toronto – Florida 5:4 (3:1, 1:0, 1:3)
Seriyada hesab – 1:0.

7 may
Vaşinqton – Karolina 1:2 ОТ (0:0, 1:0, 0:1, 0:1)
Seriyada hesab – 0:1.
Veqas – Edmonton 2:4 (2:1, 0:0, 0:3)
Seriyada hesab – 0:1.

8 may
Toronto – Florida 4:3 (1:1, 2:1, 1:1)
Seriyada hesab – 2:0.
Vinnipeq – Dallas 2:3 (0:0, 2:3, 0:0)
Seriyada hesab – 0:1.

9 may
Vaşinqton – Karolina 3:1 (0:0, 1:0, 2:1)
Seriyada hesab – 1:1.
Veqas – Edmonton 4:5 ОТ (1:0, 1:3, 2:1, 0:1)
Seriyada hesab – 0:2.

10 may
Florida – Toronto 5:4 ОТ (1:2, 3:1, 0:1, 1:0)
Seriyada hesab – 1:2.
Vinnipeq – Dallas 4:0 (2:0, 1:0, 1:0)
Seriyada hesab – 1:1.

11 may
Karolina – Vaşinqton 4:0 (0:0, 2:0, 2:0)
Seriyada hesab – 2:1.
Edmonton – Veqas 3:4 (2:2, 0:1, 1:1)
Seriyada hesab – 2:1.
Dallas – Vinnipeq 5:2 (2:1, 0:1, 3:0)
Seriyada hesab – 2:1.

12 may
Florida – Toronto 2:0 (1:0, 0:0, 1:0)
Seriyada hesab – 2:2.