“Fənər”in kapitanı nədən infeksiyaya yoluxub?
''Beşiktaş''la oyuna hazırlaşan ''Fənərbaxça''da Mərt Hakan Yandaşın komandadan ayrı düşməsinin səbəbi bəlli olub.
''Fənər''in kapitanlarından olan təcrübəli futbolçu son rəsmi matçını martın sonlarında keçirib. Son 3 rəsmi matçda isə onun adı ümumiyyətlə iştirak ərizəsinə salınmayıb. Təcrübəli futbolçu bu günlərdə öz səhifəsində paylaşım edərək bunları yazmışdı:
''Son günlər xəstəxanada müalicə olunuram. Bu müddətdə nə yaşadıqlarımı mən özüm və yaxınlarım gözəl bilir. Müalicə zədə ilə bağlı deyil. Təxminən 20 gündü, davam edən və məndən asılı olmayan bir infeksiya üzündən müalicə olunuram. Ən azı xəstəxanadan çıxana qədər mənə qarşı anlayışlı olacağınıza ümid edirəm''.
Peşəkar futbolçuların müalicəsi 99 faiz hallarda meydanda aldığı zədə ilə bağlı olur. Amma Mərt Hakanın açıqlamasından sonra onun probleminin nə ilə bağlı olduğu hər kəsə maraqlı idi. Türkiyə mətbuatının yazdığına inansaq, 30 yaşlı futbolçunun ayağına vurdurduğu döymədən sonra vəziyyəti pisləşib. Həmin döymə üzündən onun bədəninə infeksiya düşdüyü məlum olub! Özü də Mərt Hakanın durumu kifayət qədər ciddidi. Həkimlər onun meydana nə vaxt qayıdacağı ilə bağlı dəqiq proqnoz verməkdən çəkinirlər.
Bu futbolçunun bu mövsüm 27 rəsmi oyunda forma geyərək 1 qol, 4 məhsuldar ötürmə ilə fərqləndiyini bildirək.
Digər xəbərlər
