“Fənərbaxça” ilə bağlı yeni transfer xəbərləri var. Bu yay artıq heyətini 8 yeni futbolçu ilə gücləndirən komandanın bundan sonra diqqətini yerli oyunçulara yönəldəcəyini xəbər vermişdik.

"Football-plus.az"ın məlumatına görə, “Marsel”in tələbləri bitmədiyi üçün Cengiz Ündərin transferi hələ ki düyünə düşüb. Amma əvəzində Mərt Müldürün keçidi bitmək üzrədi. Türkiyə yığmasının üzvü dünən axşam saatlarında İstanbula gəlib.

Son dönəmlərdə tez-tez olduğu kimi bu transferdə də “Fənərbaxça” ilə “Qalatasaray” üz-üzə gəlməli olmuşdu. Ötən həftə Türkiyə mətbuatında Mərtin “Qalatasaray”a daha yaxın olduğu idda edilsə də, göründüyü kimi, 24 yaşlı qürbətçi futbolçu “Fənər”ə qismət olub. Keçidin detalları hələ açqılanmasa da, bu transferin “sarı-lacivərdlilər”ə 2,5 milyon avroya başa gələcəyi gözlənilir.

Mərtlə dördillik müqavilə imzalanacaq. Qeyd edək ki, əsasən müdafiənin sağ cinahında oynayan Mərt Müldür Avstriyada doğulub və “Rapid”in yetirməsidi. Peşəkar karyerasına bu klubda başlayan futbolçu 2019-dan bəri “Sassuolo”nun şərəfini qoruyurdu. Ötən mövsüm yalnız 13 rəsmi oyuna çıxan Mərt Türkiyə yığmasında indiyə qədər 18 qarşılaşmada forma geyib və 1 qol vurub.

Bundan başqa, “Fənər”, nəhayət, Miha Zayts ilə də yeni müqaviləylə bağlı razılıq əldə edib. Sloveniya yığmasının üzvünün klubla müqaviləsinin müddəti bu yay başa çatmış və o, sərbəst oyunçuya çevrilmişdi. Zayts da dünən axşam İstanbula gəlib. 29 yaşlı yarımmüdafiəçi 2018-dən “Fənər”dədi.

Arada yalnız 2020/21-i icarə əsasında “Cenoa”da keçirən, qalan 4 mövsümdə isə “Fənər”in heyətində olan təcrübəli futbolçu indiyə qədər bu klubda 102 rəsmi oyunda 18 qol, 7 məhsuldar ötürməlik performans sərgiləyib.