Ən son xorvatiyalı ulduz Ante Rebiçi transfer edən “Beşiktaş” əsas qapıçısı ilə müqaviləni yeniləyib.

"Football-plus.az" xəbər verir ki, söhbət Mərt Günokdan gedir. Təcrübəli qapıçının müqavilə müddəti gələn yay başa çatırdı. Onunla 2025-ə qədər yeni müqavilə imzalanıb.

Qeyd edək ki, “Fənərbaxça”nın yetirməsi olan 34 yaşlı əlcək sahibi bu klubdan başqa “Bursaspor” və “İstanbul BŞ”nin şərəfini qoruyub. “Beşiktaş” onu 2021-in yayında 1,4 milyon avroya heyətinə qatmışdı. İlk mövsümdə ağır zədə alaraq uzun müddətə sıradan çıxan qapıçı ötən mövsümə əsas heyət üzvü kimi başlamamışdı. Valerien İsmael ona şans vermirdi. Amma Şenol Günəş gələndən sonra vəziyyət dəyişdi. Əsas qapıçıya çevrilən və ümidləri doğrultmağı bacaran Mərt hətta yığmada da əsas heyətə düşməyə başladı. Mərt Günok indiyə qədər “Qartal”da 30 rəsmi oyunda forma geyib.

Yeri gəlmişkən, Rəşid Gezzaldan yenə üzücü xəbər gəlib. Ötən mövsümü faktiki zədə üzündən boşa verən təcrübəli əlcəzairli futbolçu yenə zədələnib. “Tirana” ilə ilk oyunu buraxan Gezzal cavab görüşündə də komandaya yardım edə bilməyəcək. Onun nə vaxt qayıdacağı ilə bağlı dəqiq məlumat yoxdu. Amma klubun tibbi personalı Gezzala ən azı bir həftə dincəlməyi tövsiyə edib. 2021/22-dəki çempionluqda mühüm rol oynayan, fanatların böyük sevgisini qazanan 31 yaşlı futbolçu ötən mövsüm 11 rəsmi oyunda cəmi 494 dəqiqə oynamaq şansı qazanmışdı. Gezzalın son dönəmlərdə zədəyəmeyilli olması rəhbərliyi və Günəşi narahat etməyə başlayıb. Deyilənə görə, “ağ-qaralar” artıq onun yerinə futbolçu axtarmağa başlayıb. Gündəmə gələn ilk isim Matias Varqasdı. Daha öncə “Veles Sarsfild” və “Espanyol”da top qovmuş 26 yaşlı argentinalı yarımmüdafiəçi Türkiyə futbolunu yaxşı tanıyır. Belə ki, o, 2021/22-ni icarə əsasında “Adana Dəmirspor”da keçirib. Ötən mövsümdə isə Çin təmsilçisi “Şanxay Port”un şərəfini qoruyub və müqavilə ilə məhz bu kluba məxsusdu.

Türkiyə mətbuatının yazdığına inansaq, “Beşiktaş” çinlilərə 1,5 milyon avro, futbolçunun özünə isə illik 1,8 milyon avro təklif edib.