''Fənərbaxça'' dünən Türkiyə çempionatının 31-ci turunda ''Adana Dəmirspor''u öz meydanında 4:2 hesabı ilə məğlub edərək ''Qalatasaray''ın təqibini davam etdirdi.

Qarşılaşmanın ardından isə qalmaqal yaşandı. Düzdü, bu qalmaqal bir müddət öncə Trabzonda yaşanan özbaşınalıqdan fərqləndi. Belə ki, ''Ülkər'' stadionunun parkinq yerində əsəblər tarıma çəkildi. ''Fənər''in 3-cü kapitanı Mərt Hakan Yandaşın Volkan adlı sürücüsü ilə adanalıların yönəticisi Gökhan Göktürk arasında ciddi münaqişə yaşandı. Həmin sürücü Göktürkə hələ oyun bitənə yaxın mesaj ataraq onu görüşə çağırıbmış. Sonra isə parkinqdə onunla görüşərək təhqiramiz ifadələr işlədib və hətta onu vurduğu cəhd edib. Təhlükəsizlik xidmətinin işçilərinin araya girməsindən sonra vəziyyət sakitləşdi. Baş verənlərin ardından ''Adana Dəmirspor''un sabiq prezidenti Murat Sancak ''Fənər''li yönəticilərə və Mərt Hakan Yandaşa etirazını bildirdi. Hadisə yerində çəkilən və sosial şəbəkələrdə yayılan bir videoda Sancakın ''Fənər''in forvardı Sərdar Dursuna ''Mərt Hakana denən, sürücüsünə sahib çıxsın'' dediyi görünür. Qeyd edək ki, bu komandaların ötən ilin noyabrında Adanada baş tutan və qolsuz başa çatan oyunu hakim qərarları üzündən böyük müzakirələrə səbəb olmuşdu. Həm də adanalı futbolçuların bəzi epizodlardakı hədsiz sərtliyi diqqətdən qaçmamışdı. Ona görə də bu dəfə yaşanan olayları bir növ qisas da adlandırmaq olar.

ƏLİ