''Fənər'' və ''Beşiktaş''da ayrılıqlar başladı
Türkiyə çempionatında mövsüm başa çatan kimi klublarda ayrılıqlar başladı.
“Football-plus.az” xəbər verir ki, ilk vida xəbərləri İstanbul nəhənglərindən gəlib. ''Fənərbaxça'' və ''Beşiktaş'' bir üzvü ilə sağollaşıb. ''Fənər'' Coşua Kinq ilə müqaviləni yeniləməmək qərarına gəlib. Norveçli futbolçu paylaşımında bunları yazıb:
''Zədələr üzündən istədiklərimi həyata keçirə bilmədim və buna görə də üzr istəyirəm. Burdan ''Fənərbaxça'' azarkeşi olaraq ayrılıram. Ümid edirəm ki, gələn mövsüm çempion olacaqsız. Çünki qəlbimdə siz fanatların buna hər kəsdən çox layiq olduğunuzu hiss edirəm. Bu, vida deyil. Çünki dəstək olmaq üçün geri qayıdacam''.
''Fənərbaxça''ya 2022-nin yayında gələn təcrübəli futbolçu ''sarı-lacivərdlilər''in heyətində 54 rəsmi oyuna çıxaraq 12 qol, 7 məhsuldar ötürmə ilə fərqləndi. ''Beşiktaş'' isə Co Uorrall ilə vidalaşıb. ''Qartal'' 27 yaşlı bu ingiltərəli müdafiəçini bu mövsümün qış transfer dönəmində ''Nottingem Forest''dən icarəyə götürmüşdü. Uorrall paylaşımında ''təşəkkürlər ''Beşiktaş'', burdan gözəl xatirələrlə ayrılıram'' sözlərini yazıb. Bu futbolçu ''ağ-qaralar''ın heyətində 6 ay ərzində 9 rəsmi oyuna çıxaraq 1 qol vura bildi.
ƏLİ
Digər xəbərlər
