"Neftçi" Misli premyer-liqasının 32-ci tur matçında "Qarabağ"ın meydanında böyükhesablı məğlubiyyətlə üzləşdi - 0:3.

"Football-plus.az" xəbər verir ki, "ağ-qaralar"ın baş məşqçisi Samir Abasov oyunsonrası mətbuat konfransında jurnalistlərin suallarını cavabladı.

- Niyə məğlub olduz, niyə qol vura bilmədiz?
- Qol vurmaq üçün imkanlar oldu. Qapının içindən də vura bilmədik. Rəqibin fürsətləri bizdən daha çox idi. Əsas məsələ niyə qol buraxmağımızdı. Heyətdə kubok matçına görə xeyli rotasiya etmişdik. Bir tərəfdən də zədələr böyük problemə çevrilib. Oyuna yaxşı başlamışdıq. Fərdi səhvlər başımızın bəlasıdı.

- "Neftçi" 4 ildi ki "Qarabağ"a qalib gələ bilmir...
- Bəli, bu Azərbaycan derbisidi və qalib gəlməlisən. Nə olsun ki, qarşıda kubok oyunu var, zədəlilər çoxdu. Bu durum haqda söz tapa bilmirəm.

- Murad Məmmədova son oyunlarda az şans verməyinizin səbəbi nədi?
- Pis çıxış etdiyi matçlardan sonra özünə gələ bilmir. Biz onu silməmişik. Muradı məşqlərdə tanıya bilmirik. Düzü, Aleksin yerinə Murada şans vermək istəyirdim. Sadəcə, Rəhman zədələndiyi üçün Elcan Əbilovu meydana buraxdıq. Murada güvənirəm.

- "Zirə", "Araz-Naxçıvan" və "Turan Tovuz" "Qarabağ"ı qalib gəlib, "Sabah" isə heç-heçə edib. Avrokuboklara getmək istəyən "Neftçi" 4 oyunun hamısında bu rəqibə uduzub. Sizcə, bu komanda avrokuboklara getməyə layiqdi?
- Avrokuboklara getmək üçün şərt ancaq "Qarabağ"ı udmaqdı? Bu məntiqi anlamıram. 4 oyunun hamısını mənim üzərimə yıxmayın. Son oyunda "Qarabağ"a qarşı yaxşı oynamışdıq. "Qarabağ"a uduzmaq o demək deyil ki, avrokuboklara getməyə layiq deyilik.

- Quzzonun zədəsi ciddidi?
- Xeyr. Həm də özü əvəzlənmək istədi.

- Darbonu bu gün start heyətində oynatmağınızın səbəbi nə idi? Nəzərə alsaq ki, Sambu da start heyətində meydana çıxa bilərdi. Onsuz da kubok oyununda oynaya bilməyəcək.
- Darbo iki aydan çoxdu ki, zədə səbəbindən oynamırdı. "Sabah"la kubok matçından əvvəl formasını bərpa edə bilməsi üçün start heyətində meydana buraxdıq.

KƏNAN BAHADIR