"Rza Belarusa qarşı matçda zədəli olsa da, meydana çıxıb" - Samir Abasov

"Neftçi" Misli premyer-liqasının evdə keçirilən 28-ci tur matçında "Araz-Naxçıvan"la heç-heçə etdi - 1:1.

"Football-plus.az" xəbər verir ki, "ağ-qaralar"ın baş məşqçisi Samir Abasov oyunsonrası mətbuat konfransında jurnalistlərin suallarını cavabladı.

- Sanki real qol şanslarında məntiqi sonluq çatmırdı. Bunun səbəbi nədi?
- Üstünlük bizdə idi. İkinci hissədə daha yaxşı oynadıq. Fürsətləri dəyərləndirmək futbolçuların fərdi ustalığıyla bağlı məsələdi. Bu qədər imkan əldə ediriksə, yaxşıdı. Amma xal itirmək bizi üzür.

- Hakimin bəzi qərarlarından narazı qaldız...
- Bəli, hakimin qərarlarından həddən artıq narazıyam. Bizim oyunlarda hakimlik aşağı səviyyədə olur. Tempi öldürmək, birtərəfli qərarlar heç xoşuma gəlmədi. Bu məsələlər bizi narahat etməyə başlayıb.

- Kubok oyununda heyətdə dəyişiklik edəcəksizmi?
- İşimiz real qol epizodları yaradıb dəyərləndirməkdi. Futbolçular həmin anlarda düzgün qərar verməlidi. Həddən artıq çox itkimiz var. Ola bilər ki, daha 2-3 futbolçunu itirək. Kubok matçına son oyunumuz kimi çıxacağıq.

- Millinin düşərgəsindən qayıdan futbolçuların psixoloji durumu nə yerdədi?
- Futbolçularımızın nəinki psixoloji, həm də fiziki durumları ürəkaçan deyildi. Rza Cəfərov əsas qapımızdı. Belarusa qarşı matçda zədəli olsa da, meydana çıxıb. Bunun səbəblərini araşdırırıq.

- "Sabah"la kubok matçından əvvəl komandada hansı müsbət məqamları qeyd edə bilərsiz?
- Hələ də bilmirəm ki, Bassala Sambu niyə qırmızı vərəqə alıb.. Yəqin ki, bunu heç vaxt bilməyəcəm. Narahat olduğumuz məqamlar var.

KƏNAN BAHADIR