"Neftçi" Misli premyer-liqasının 30-cu tur matçında evdə "Zirə"yə uduzdu - 2:4.

"Football-plus.az" xəbər verir ki, "ağ-qaralar"ın baş məşqçisi Samir Abasov oyunsonrası mətbuat konfransında jurnalistlərin suallarını cavabladı.

- 2:0 üstünlük əldə etsəz də, sonda uduzduz. Bunu nəylə əlaqələndirirsiz?
- Problemləri bilirik. Hamısını həll etmək çox çətin prosesdi. Əfsuslar olsun ki, bəzi komponentləri dəyişməkdə çətinlik çəkirik. Bəli iki qol vurduq. Epizodların birində Ağadadaş təkbətək çıxıb rəqibə "qırmızı" aldıra bilərdi. Rəqiblərin hücumları təhlükəli alınır. Bu çatışmazlığı aradan qaldıra bilmirik. Təkbətək mübarizələrdə də uduzuruq. Bunu gizlədə bilmərik. Statistika göz önündədi. Qarşıda bizi çox çətin kubok matçı gözləyir. Mövsümü xilas edəcək oyun olacaq. "Sabah"ın önünə fərqli motivasiya ilə, karyeramızın son matçı kimi çıxmalıyıq.

- "Sabah"la kubok matçında geridönüşə inanırsız?
- İnanıram. "Sabah" da bu oyuna son şans kimi baxır.

- Məğlubiyyətlə özünüzü nə dərəcədə təqsirli görürsüz?
- İnkişaf etmək istəyiriksə, özümüzü də təhlil etməliyik. Ən yaxşı yol özünü daha da yaxşılaşdırmaqdı. Bütün məğlubiyyətlərdə günah baş məşqçidə olur. Amma əl-qolumuzu sallamalı deyilik. Bura gələndə problemlərdən xəbərdar idim. Belə vəziyyətlərə hazırlıqlı olmaq lazımdı.

- "Sumqayıt"da işləmək daha çətin idi, yoxsa "Neftçi"də?
- "Neftçi"də... "Sumqayıt"da bu yolu daha rahat gedə bilirsən. Burda isə hər oyunda qələbə qazanmalısan. "Neftçi" hazırda iddialı komanda olmaqdan uzaqdadı.

KƏNAN BAHADIR