"Neftçi" ölkə kubokunun 1/4 final mərhələsinin ilk oyununda "Kəpəz"in meydanından qalib ayrıldı - 2:0.

"Football-plus.az" xəbər verir ki, "ağ-qaralar"ın baş məşqçisi Samir Abasov oyunsonrası mətbuat konfransında jurnalistlərin suallarını cavabladı.

- Kubok oyunlarına necə kökləndiyimizdən xəbərdarsız. Bu bizim motivasiya mənbəyimizdi, ümidimizdi. Çətin səfər oyununda qələbə qazandıq. Amma hələ heç nə bitməyib. Rəqib bəzi epizodlarda fərqlənə və ya biz daha böyükhesablı qələbə qazana bilərdik. Əsas odu ki, növbəti oyuna daha inamlı hazırlaşacağıq. Futbolçularıma təşəkkür edirəm. Kubok matçlarının əhəmiyyətini dərk edirlər.

- Ardıcıl ikinci matçda həm qalib gəldiz, həm də qol buraxmadız. Komandada nəyi dəyişmisiz?
- Bura gələndən uğurlu seriya əldə edə bilmirdik. Düzdü, indi də ideal durumda deyilik. Lakin çıxış yolları tapmağa çalışırıq. Əsas məqsəd intizamlı oyun sərgiləməkdi. Rəqibə fürsət verməməli, sıx oynamalı, müdafiə xəttində bir-birimizi "sığortalamalıyıq". "Sabah" və "Şamaxı"yla matçlarda bunu bacardıq. Bu gün də həmçinin.

- Misli premyer-liqasında növbəti mövsümdən başlayaraq komanda sayı artırıldı, legioner limiti ləğv edildi. Bu qərarları necə şərh edə bilərsiz?
- Mən bu haqda danışanda heç kim danışmırdı. Jurnalistlər də deyirdi ki, Samir Abasov belə şeylər danışır. Elə bil Azərbaycan futbolunun taleyi mənim əlimdədi... Dünən qatarla Tovuza gələndə də eyni adamlar bu haqda danışırdı. Nə bu söhbətlərə daxil olmuşam, nə də nəsə demişəm. İnanın ki, iş başdan aşır. Bu qərarların futbolumuza yaxşı və ya pis təsir edəcəyi haqda düşünməmişəm, düşünməyəcəm də. Qərarlara uyğun addım atacağıq.

KƏNAN BAHADIR