Samir Abasov “Neftçi”nin böyük ümidlərlə ötən ilin yanvarında gətirdiyi futbolçulardan biri Alfa Konteni əvəzedici heyətə göndərib.

Samir Abasovun “qara siyahısına düşən” Syerra-Leonedan olan futbolçu nə “Araz-Naxçıvan”la çempionat, nə də “Sabah”la kubok oyununda meydana çıxıb. “Neftçi”nin heyətində premyer-liqada 10 oyuna çıxan hücumçu sonuncu dəfə 27-ci turda - “Səbail”lə oyunun 85-ci dəqiqəsində şans qazanıb. 10 çempionat, 2 kubok oyununda qol vurmayıb, hər turnirdə bir məhsuldar ötürməsi var. Ümumiyyətlə, Alfa 2025-də bütün turnirlərdə, sadəcə, 5 oyuna çıxıb ki, cəmi birində ilk “onbirlik”də olub.

Driblinq bacarığı və sürəti normal olan Konte nədənsə hücumçu kimi komandaya fayda verə bilmir. Demək olar ki, rəqibin cərimə meydançasında təhlükəli heç nə ilə yadda qalmır. Reyd etmək istəyərkən yersiz top itkilərinə yol verir.

Samir Abasov məhsuldarlıq göstərməyən hər futbolçunu əvəzedici heyətə göndərən məşqçi deyil. Bəlkə də məşqlərdə can yandırmaması və ya intizamsızlıq 47 yaşlı mütəxəssisi bu addımı atmağa vadar edib.

MÜZƏFFƏR QULUZADƏ