"Neftçi" Misli premyer-liqasının "doğma divarlar" arasında keçirilən 15-ci tur matçında "Qarabağ"a uduzdu - 0:3.

"Football-plus.az" xəbər verir ki, "ağ-qaralar"ın baş məşqçisi Samir Abasov oyunsonrası mətbuat konfransında jurnalistlərin suallarını cavabladı.

- Sonda hansı nəticə sizin üçün uğur sayılacaq? Futbolçular bu gün maksimum potensialını sərgilədi, yoxsa daha yaxşısını bacara bilərlər?
- Potensialdan danışmaq istəmirəm. "Neftçi"nin baş məşqçisisənsə, futbolçususansa, sənə belə oyunlarda qazandığın nəticəyə uyğun qiymət verilir. Komandam haqda bir oyuna görə nəsə demək istəmirəm. Görüləcək iş çoxdu. Hədəf yüksəkdi. Qıraqdan görünməyən problemlər var. Sevindirici haldı ki, əhval-ruhiyyə yaxşıya doğru gedir. Stadionda əla atmosfer var idi. Bunun üçün azarkeşlərimizə təşəkkür edirəm.

- Ramilin faydalı iş əmsalı sizi qane edirmi?
- Üzürlü hesab edin, amma futbolçular haqda fərdi olaraq danışmaq istəmirəm. Məni fərqli məsələlər narahat edir. Bəlkə də bu problemləri başqaları görmür. Bəzi futbolçularla bağlı mövzulara görə çox narahatam.

- "Neftçi" hücum xəttində istəkli görünmürdü...
- Bu fikirlə razı deyiləm. Sadəcə, son anlarda nəsə çatmadı. Xeyli epizod yaratdıq. Məncə, əsas səbəb psixoloji məqamlarla bağlıdı.

- Avrokuboklara yollanmağın asan yolu liqadı, yoxsa ölkə kuboku?
- Kubokda şansımız var. Amma liqanı boşa vermək istəmirik. Hər çempionat matçına avrokuboklara yollanmaq üçün sonuncu şans kimi çıxacağıq. Kubok uğrunda da mübarizə aparacağıq. Başqa cür düşünmək "Neftçi" adına yaraşmaz.

- Növbəti turda "Sumqayıt"la qarşılaşacaqsız. "Mehdi Hüseynzadə"də hansı ab-havanı gözləyirsiz?
- Ab-havanı "Neftçi" özü yaradır. Bu komanda hara getsə, həmin matçda azarkeş sayı birə-beş artır.

- "Qarabağ" ikinci heyəti ilə "Neftçi"ni məğlub etdi. Bəlkə çempionata əvəzedici heyətlə davam edəsiz? Kubok matçları üçün daha güclü heyət formalaşdırmaq mümkün ola bilər.
- Heyəti indiki futbolçulardan formalaşdırmalıyıq. Bunlar getsin, başqaları gəlsin deyə nəsə yoxdu. Hamının üzüldüyünü bilirəm. Amma vəziyyəti soyuqqanlı təhlil etməliyik.

- Qışda hansı mövqelərə transfer edəcəksiz?
- Bu barədə hələ ki öz aramızda danışırıq. Bəzi məqamları götür-qoy edirik. Konkret qərar verməmişik.

- Elə danışdız ki, sanki məğlubiyyətin səbəbkarı futbolçulardı... Ramil Şeydayev "Qarabağ"ın sabiq futbolçusudu. Rəqibin müdafiəçiləri onu çox yaxşı tanıyır. Oyuna başqa hücumçuyla başlamaq olmazdı? 
- Ramil "Qarabağ"dan gəlib deyə oynamamalıdı? Ramil bu gün xeyli təhlükəli epizodun baş rolunda idi. Özünü "Qarabağ"a sübut etmək istəyirdi. Müdafiəçilər onu tanıyırdısa, qarşısını niyə ala bilmirdilər?!

- Adətən, derbidə məğlub komanda daha aqressiv oynayır. Hətta qırmızı vərəqəni də gözə alır. Sanki "Neftçi"nin futbolçuları vəziyyətdən narahat deyildi...
- Bilirdik ki, oyunun içində çətinliklər yaranacaq. "Qarabağ"a qarşı oynayırdıq. Matç başlayanda qurduğumuz oyunun yaxşı tərəflərini görməyə başladıq. Amma futbolçularda özünəinam yaranırdı ki, qol buraxdıq. İkinci hissədə yenə öz səhvlərimizdən qollar buraxdıq. Məsələn, Rzanın pis çıxarışı... Çirkin futbol göstərmək istəmədik. Bu yaxşı hal deyil. Belə edə bilməzdik.

KƏNAN BAHADIR