''Yanq Boyz''a uduzmaqla fanatlarını məyus edən və Çempionlar Liqasında qrup mərhələsinə düşə bilməyən ''Qalatasaray''da radikal addımlar atılmağa başlanılıb. 2 futbolçu ilə yollar ayrılıb.

Söhbət Uilfrid Zaha ilə Derrik Köndən gedir. Zaha Fransa təmsilçisi ''Lion''a icarəyə verilib. Fransızlar birillik icarə haqqı kimi ''Cim-Bom''a 3 milyon avro ödəyəcək. Kön isə ''Verder''ə birillik icarəyə verilib. Almanların icarə haqqı kimi ödəyəcəyi məbləğ barədə məlumat yoxdu. Bremen klubu gələn yay Könü daimi əsasda transfer etmək istəsə, ''sarı-qırmızılar''a 5,25 milyon avro ödəməli olacaq. ''Qalatasaray'' Könü ötən mövsümün qış fasiləsində 3,3 milyon avroya ''Hannover-96''dan transfer etmişdi. Almaniyalı sol müdafiəçi ilk aylarda pis təsir bağışlamayaraq çempionluğa töhvə vermişdi. Amma bu mövsüm onun performansı Okan Buruku qane etmədi. Kön ən son ''Yanq Boyz''la cavab matçının fasiləsində əvəzlənmişdi. Bu futbolçunun ''Qalatasaray'' karyerası 19 oyun, 1 qol, 2 məhsuldar ötürmə göstəricilərindən ibarət oldu. Zaha isə ötən yay ''Cim-Bom''a sərbəst futbolçu statusunda gəlmişdi. Ona 2,3 milyon avro imza parası verilmişdi. İllik qazancı isə 4,3 milyon avroya bərabər idi.

Şaiyələrə inansaq, ''Qalatasaray'' Zahanın maaşının yarısını ödəməkdə davam edəcək. Təcrübəli futbolçunun ötən mövsüm göstəriciləri çox da bərbad olmadı. O, 43 rəsmi oyunda 10 qol, 5 məhsuldar ötürmə ilə fərqləndi. Amma performansı Okan Buruku qane etmədi. Əslində Zahanın premyer-liqaya qayıtması gündəmdə idi. Amma vergi məsələləri üzündən onun İngiltərəyə qayıtması mümkün olmadı. Zahanın ''Qalatasaray''la 2026-ya qədər müqaviləsi var. Bu iki futbolçudan başqa ''Aslan''ın ən qısa müddətdə Leo Dyubua və Serxio Oliveyra ilə müqaviləni qarşılıqlı şəkildə ləğv edəcəyi gözlənilir. Hər iki futbolçuya onların illik maaşlarının müəyyən hissəsi ödəniləcək. Bundan başqa Hakim Ziyeş də ayrılmaq istədiyini və ''Ayaks''a qayıtmaq arzusunda olduğunu dilə gətirib. Rəhbərlik onun istəyini geri çevirməyib. Bu 3 futbolçunun ayrılığının ən qısa müddətdə açıqlanacağı gözlənilir.

ƏLİ