"Neftçi" Misli premyer-liqanın evdə keçirilən 24-cü tur matçında "Sumqayıt"ı məğlub etdi - 1:0.

"Football-plus.az" xəbər verir ki, "ağ-qaralar"ın baş məşqçisi Samir Abasov oyunsonrası mətbuat konfransında jurnalistlərin suallarını cavabladı.

- Oyuna "beşli" müdafiə sistemiylə başlasaz da, sonra "dördlü"yə keçdiz. Bundan sonra həmişə belə olacaq?
- Xeyr. Çünki bunun acısını “Araz-Naxçıvan”la oyunda çəkdik. Sadəcə əlimizdəki heyətə uyğun davrandıq. Bunun nəticəsi də artıq meydançada görünür. Risk edirik. Əsas odu ki, daha az səhvə yol veririk.

- Vaqif Cavadov penalti qərarının yanlış olduğunu dedi. Bəs, siz necə düşünürsüz?
- Mən epizoda baxmamışam. Penalti haqda nə isə deyə bilmərəm. Oyuna gəlincə, bu barədə danışmaq çətindi. Futbolçularım bəzi hallarda qərar verməkdə yubanırdı. Yenə də komandamdan razıyam. Vəziyyətə baxmadan can qoydular. Ozobiç daha düzgün qərar versəydi, bəlkə də daha tez qol vurardıq.

- Qələbələr psixoloji duruma necə təsir edir?
- Təbii ki, qələbələr komandaya motivasiya verir. Məqsədimiz daha yaxşısını bacarmaqdı. Hazırda əhval-ruhiyyə həddən artıq yaxşıdı.

- Yeni transferlər Sambo və Aleks haqda nə düşünürsüz?
- İlk oyunlara əsasən futbolçu haqda qərar vermək mənim üçün çətindi. Bütün futbolçularımıza inanırıq. Hərəsi bir oyun xeyir versə, irəliləməyimizə kömək olacaq.

- Yuri Matiası etdiyi səhvlərə görə oynatmamaq barədə heç düşünmüsüz?
- Əsla, bu haqda düşünməmişəm. Səhvlərin üzərində çox dayanmağı xoşlamıram.

- Ramil uzun müddətdi ki, əsas heyətdə oynamır. Bu gün isə ümumiyyətlə meydanda olmadı. Problemi nədi?
- Rəqabətdə hansısa problem yoxdu. Sadəcə əlimizdəki heyətlə daha yaxşısını etmək istəyirik. Çalışırıq ki, hər futbolçunu növbəti oyuna yaxşı hazırlayaq.

KƏNAN BAHADIR