"Neftçi" ölkə kubokunun 1/8 final mərhələsinin evdə keçirilən matçında "Difai"ni darmadağın etdi - 6:0.

"Football-plus.az" xəbər verir ki, "ağ-qaralar"ın baş məşqçisi Samir Abasov oyunsonrası mətbuat konfransında jurnalistlərin suallarını cavabladı.

- Futbolçularıma təşəkkür edirəm. Göstərdikləri oyun, nizam-intizam çox önəmli idi. Əzmkar çıxışla yadda qaldıq. Bu gün "Neftçi" adını təmsil etdik. Komandamdan razı qaldım. İnşallah, belə davam edəcəyik. Adımızı qorumalıyıq.

- Açıq-aşkar görünür ki, bu heyətlə nəticə qazanmaq çətindi. Bəzi futbolçular getməlidi. Bu yöndə nə kimi planlarınız var?
- Planlar üzərində düşünürük. Göndəriləcək futbolçular yox, gətirə biləcəklərimiz haqda danışırıq. Rəhbərlik də yanımızdadı. Problemli mövqelər var. Daim axtarışdayıq. Bəzi futbolçuların uzunmüddətli müqavilələri var. Prioritetimiz kiminsə göndərilməsi deyil.

- Ölkə kubokunun növbəti mərhələsində "Kəpəz"lə, ardından böyük ehtimalla, "Sabah"la qarşılaşacaqsız. Yəni finala qədər "Qarabağ"la qarşılaşmaq ehtimalı yoxdu. Bu yol sizin üçün nə dərəcədə hamardı?
- Açıq deyək ki, bu gün heç bir komanda "Qarabağ"la qarşılaşmaq istəməz. Düzü, bütün potensial rəqiblər bizim üçün çətindi. "Sabah" da, "Sumqayıt" da... İndi elə dönəmdən keçirik ki, hansısa rəqibə arxayın yanaşa bilmərik.

- Qış planlarıyla bağlı nə düşünürsüz?
- Qəti qərarımızdı ki, ölkə daxilində hazırlaşaq. Məşqimizi burda edəcəyik. Alınsa, yoldaşlıq görüşləri keçirəcəyik.

- Qarşıdan "Sumqayıt"la oyun gəlir. Görəsən, komandanı "Sumqayıt"a qarşı hazırlaşdırmaq çətindi, yoxsa "Qarabağ"a?
- "Qarabağ"a.
KƏNAN BAHADIR