"Neftçi" Misli premyer-liqasının evdə keçirilən 21-ci tur matçında "Şamaxı"nı məğlub etdi - 1:0.

"Football-plus.az" xəbər verir ki, "ağ-qaralar"ın baş məşqçisi Samir Abasov oyunsonrası mətbuat konfransında jurnalistlərin suallarını cavabladı.

- Premyer-liqadakı bütün rəqiblərlə oynamaq çətindi. Hər oyunda elə əziyyət çəkməyimiz normaldı. Komandamdan razı qaldım. Həddindən artıq intizamlı çıxış etdik, rəqibə imkan vermədik. Bu məqamlar məni çox sevindirdi. "Şamaxı"nın heyətində fürsətləri maksimum dəyərləndirən futbolçular var. İndi ölkə kubokunda keçirəcəyimiz oyuna köklənmişik. Bugünkü qələbə həmin oyun üçün bizə motivasiya verdi.

- Bu gün bəzi futbolçuların, xüsusilə, Emin Mahmudovun performansında irəliləyiş hiss olundu. Son bir həftə ərzində nəyi dəyişdiz?
- Ötən həftə yaşadığımız məğlubiyyətin səbəbkarı mənəm. Çünki reallığa yox, adımıza aldandım. Nəticə göz qabağında idi. Bu gün ortaya reallıq qoyduq. Həddindən artıq düzgün oynamalıyıq. Xeyli iş görülməlidi. Bu, qapıçıdan hücumçuya qədər davam edəcək prosesdi. İnşallah, növbəti oyunlarda da "Neftçi"nin reallığını göstərməyə çalışacağıq.

- Etiraf edək ki, "Şamaxı" ilk yarım saat ərzində daha yaxşı çıxış etdi...
- Ştoqrin uzun müddət meydandan kənarda qaldı. Bu gün isə əvəzləndi. Onun yerinə meydana daxil Ervin Koffi daxil oldu. Ervində təngnəfəslik vardı. Bunları nəzərə alsaq, nəticədə rəqib üstün oynadı. Hər halda, nəzarəti sonradan ələ keçirdik.

KƏNAN BAHADIR