"Araz-Naxçıvan" Misli premyer-liqasının evdə keçirilən 17-ci tur matçında "Sabah"a uduzdu - 0:1.

"Football-plus.az" xəbər verir ki, "qırmızı-ağlar"ın baş məşqçisi Elmar Baxşıyev oyunsonrası mətbuat konfransında jurnalistlərin suallarını cavabladı.

- Matç hər cəhətdən maraqlı keçdi. Komandalar ən yaxşısını etməyə çalışdı. Futbolçularımdan razı qaldım. Hər biri istədiyim oyunu oynamaq istəyirdi. Futbolda bəzən belə də olur. Üstün oynasan da, uduzursan... Bu matçı unudub yolumuza davam edəcəyik.

- Sizcə, nəticəyə şanssızlıq, yoxsa hakim təsir etdi?
- Hakimi suçlamağın tərəfdarı deyiləm. Mənə elə gəlir ki, birinci hissədəki epizoda görə, penalti verilməliydi. Amma hakim rəqibin müdaxiləsinin yüngül olduğunu dedi. Yəqin ki, Hakimlər Komitəsiylə görüş olanda bəzi detalları bizə başa salacaqlar. Şanssızlıq da deməzdim. Sadəcə, daha çoxunu etməliyik. Epizodlardan faydalanmalıyıq.

- "Qarabağ"la oyun ərəfəsində uduzmağınız komandaya necə təsir edəcək?
- Bu sualı birinci turdan sonra da eşitmişdim. Dedilər ki, "Qarabağ"a 1-4 hesabıyla uduzduz, məğlubiyyət komandaya necə təsir edəcək... Çempionat uzundu. Bir məğlubiyyətə görə ruh düşkünlüyü yaranmamalıdı. Möhkəm kollektivimiz var. İnanıram ki, futbolçularım ən yaxşısını edəcəklər.

KƏNAN BAHADIR