Samir Abasov: “Qərar verməkdə çətinlik çəkirik“
Misli premyer-liqasında 18-ci tura start verilib.
“Sabah” “Sumqayıt”ı darmadağın edib 6:0. Oyundan sonra sumqayıtlıların baş məşqçisi Samir Abasovun mətbuat konfransı keçirilib. Sizi mütəxəssisin fikirləri ilə tanış edirik:
“İstəyirdik, ili yaxşı bitirək. Belə məğlubiyyət gözləmirdim. Ardıcıl qələbələrdən sonra bir təhlükə var idi. "Sabah" əvvəl oynadığımız rəqiblərdən fərqli idi. Digərləri bizim gücümüzə görə olmuşdu. "Sabah" buraxdığımız səhvləri bağışlamadı. Uduzmağımızın səbəbi qlobaldı. Tez fikirləşməkdə uduzduq, qərar verməkdə gecikdik. Oyunun əvvəlindən göründü ki, axsayırıq. Qərar verməkdə çətinlik çəkirik. Bu, bizim bəlamızdı. Bu da oyunçu keyfiyyətindən asılıdı”.
- 4 müdafiəçi ilə oynamağınız nə ilə bağlı idi?
- Son oyunlarda 4 müdafiəçi ilə oynayırdıq və dəyişmək istəmədik. Biz çempionatımızın nə qədər yaxşı olduğunu deyirik. Gördüyümüz şeylər vizualdı. Oyunçuların verdikləri qərarları görə bilmirik. Buraxdığımız epizodlara baxanda, fərdi səhvləri, düzgün qərar verilməməsinin nəticəsini görürük. Qərarlarda olan yanlışlıq tək bizdə deyil, digər klublarda da var.
- İkinci hissədə vəziyyəti düzəltmək üçün tələsmirdiz sanki...
- Özümüzdə əminlik olsaydı, edərdik. Yeni transfer hələ hazır deyil. Oyuna girib sürəti artıra biləcək oyunçularımız yoxdu. Rüfəti meydana buraxdım, nə dəyişdi? Sürət artmadı.
- Todoroskinin ehtiyatda qalmasının səbəbi nə ilə bağlıydı?
- Səbəblər var və açıqlamaq istəmirəm. Özümüzdə qalsın.
- Yeni transfer Terrens Tisdellə bağlı fikirləriniz nədi?
- Qalıb məşq edəcək. Formaya düşməsi üçün çalışacaq. Yaxşı görünür, lakin yenə də necə olduğu meydanda bilinəcək.
- "Qara siyahı"nız var?
- Bəli, var. Bu, yeni gələnlərdən də asılı olacaq.
Digər xəbərlər
