"Neftçi" Misli premyer-liqasının 11-ci turunda "Sabah"ın meydanından 1 xalla ayrıldı - 0:0.

"Football-plus.az" xəbər verir ki, "ağ-qaralar"ın baş məşqçisi Samir Abasov oyunsonrası mətbuat konfransında jurnalistlərin suallarını cavabladı.

- Meydana qələbə üçün çıxmışdıq. Geriyə yol yoxdu. Hər oyunda belə edəcəyik. Bəs məqsədimiz üçün hər şeyi etdikmi? Bunun üzərində dayanacağıq. Komandam birinci hissədə yaxşı futbol oynamağa çalışdı. Bəzi epizodlarda top itirməkdən, risk etməkdən çəkinirdik. Bəlkə də bu, komandanın əvvəlki oyunlarda uduzmasından irəli gəlir. Bu psixologiyadan mübariz oyunla xilas olmalıyıq. Qələbə qazansaq, daha yaxşı olardı. Əminəm ki, daha yaxşısını edə bilərik. Futbolçularıma böyük güc sərf etdikləri üçün təşəkkür edirəm.

- Alfa Konte keçən oyunun ən yaxşılarından idi. Bu dəfə ehtiyatda qalmışdı. Məşqlərdə özünü yaxşı tərəfdən göstərmirdi?
- 20 futbolçumuz var. Oyunçuların hamısını formada saxlamalıyıq. Kontenin meydana çıxmamasının xüsusi səbəbi yoxdu. Kimin nəyə qadir olduğunu bilməliyəm. Bütün futbolçulardan razıyam. Amma rotasiyalar olacaq.

- İkinci hissədə bir qədər zəif çıxış etdiz. Bu, fiziki problemlə bağlıdı, yoxsa uduzmamağa çalışırdız?
- Fiziki hazırlıqla bağlı danışmaq istəmirəm. İki həftədə nəyi dəyişə bilərik? Sadəcə, bəzi epizodlarda hücum edərkən tam gücümüzdən istifadə etmədik.

- Qarşıdakı 4 ev oyununda neçə xal qazansaz, sizi qane edə bilər?
- Komandanın düşdüyü vəziyyət kritik idi. Biz qələbə qazansaq da, bizdən öndəki komandalarda xal və ya xallar əldə edir. Məsələn, bu gün penaltidən qol buraxsaydıq, psixoloji cəhətdən geriləyə bilərdik. Hər oyuna qələbə üçün çıxmalıyıq.

- Boqomolski komandaya nə dərəcədə faydalıdı? Bu gün ona şans verdiz, amma özünü yaxşı tərəfdən göstərə bilmədi.
- Bir daha təkrar edim ki, bütün futbolçulara şans verib yoxlamaq istəyirəm. Hamısını tanımaq üçün oynatmalıyam. Bu günə kimi gördüyüm mənzərə bütün futbolçulardan razı qaldığımı deməyə əsas verir.

- Cinah oyunçularının keyfiyyətiylə bağlı problem görünür...- Mən belə düşünmürəm. Keyfiyyətləri haqda nəsə deyə bilmərəm. Psixoloji cəhətdən bəzi problemlərin öhdəsindən gəlməliyik.

- Emin Mahmudovu yenə start heyətində gördük. Əvvəlki Emini izləyə bilməyimiz üçün nə qədər vaxt lazımdı?
- Emin çox istəkli, bacarıqlı və təcrübəli yerli futbolçularımızdan biridi. Məşqlərdə çox çalışır. Hiss edirəm ki, meydana çıxıb oynamaq üçün alışıb-yanır. Bütün futbolçularıma, həmçinin, Eminə çox güvənirəm.

- İki oyun, 4 xal... Futbolçular məğlubiyyət libasını söküb ata biliblər?
- Düzü, yox. Bunun üçün qələbələr lazımdı. 9 oyun qalib gələ bilməmək istər-istəməz oyunçulara təsir edib. Onların psixologiyasını pik həddə yaxşılaşdırmaq üçün vaxt lazımdı.

- Qapıçılarla bağlı durum necədi? Emil Balayevin şans qazanması mümkündümü?
- Təbii ki, o da meydanda olacaq. Amma bunun üçün həm fiziki, həm də psixoloji cəhətdən hazır olmalıdı. Məşqçilər korpusu onunla bağlı müsbət fikirdə olanda meydana çıxacaq.

KƏNAN BAHADIR