Futbol üzrə ölkə çempionatının 1-ci liqasında 12-ci turun oyunları dekabrın 25-26-da keçiriləcək. Ardından klublar qış fasiləsinə yollanacaq.

İlin son turuna “İmişli” – “Mingəçevir” görüşüylə start veriləcək. Meydan sahibləri son 8 matçda məğlub olmayıb. Bu üzdən uğurlu seriyanı davam etdirmək üçün əllərindən gələni edəcəklər. Rəqibin autsayderlər pilləsində qərarlaşan “Mingəçevir” olması bu işi asanlaşdıra bilər. Çünki “nur şəhəri” təmsilçisi mövsüm başlayandan bəri güclü rəqiblərə “diş göstərməyin” yolunu tapa bilmir.

Günün ikinci oyunu “Araz Saatlı” ilə “İrəvan” arasında keçiriləcək. Rüfət Quliyevin komandası mövsüm ərzində cəmi bir qələbəylə yadda qalıb. Çempionatın aşkar autsayderi bəxtsizlik sindromundan qurtulmağa çalışacaq. Düzdü, “İrəvan” bu məqsəd üçün çətin rəqibdi. Lakin Qərbi Azərbaycan təmsilçisinin ölkə kubokundakı uğursuzluğunu unutmamaq lazımdı. Məhz bu amil matçın taleyində həlledici ola bilər. Üstəlik Nazim Süleymanovun yetirmələri ötən tur “Qaradağ Lökbatan” sınağından da üzüağ çıxa bilməyib.

“Karvan”ın “Zaqatala”yla qarşılaşması da maraqlı olacaq. Yevlaxlılar 11-ci turda gözlənilmədən “Difai Ağsu”ya uduzdu. Bu təsadüf deyilsə, komandanın yaxşı durumda olmadığını iddia etmək mümkündü. Meydan sahiblərinə isə bunun dəqiq olub-olmadığını yoxlamaq qalır.

25 dekabr
İmişli – Mingəçevir 0:0
İmişli, Heydər Əliyev adına şəhər stadionu. Saat 14.00.

Araz Saatlı – İrəvan 1:2
Sequn Omotoşo, 26 - Arsen Ağcabəyov, 45. Vüsal Qənbərov, 78.
Saatlı, Olimpiya İdman Kompleksinin stadionu. Saat 14.00.

Karvan – Zaqatala 0:2
Roini İsmayılov, 25-p. Uoren Lloyd, 84.
Yevlax, şəhər stadionu. Saat 14.00.
Xal durumu: Qaradağ Lökbatan – 24, İmişli - 20, MOİK – 22, Şamaxı, İmişli – 19, Karvan – 18, İrəvan – 20, Zaqatala - 16. Mingəçevir – 14, Difai Ağsu – 4, Araz Saatlı – 3.
Bombardir: Elşad Tağıyev (Şamaxı) – 10.

KƏNAN BAHADIR