''Qalatasaray''ın son turda səfərdə ''Qaziantep''i minimal hesabla məğlub etdiyi qarşılaşmada bir məqam dərhal diqqəti cəlb etdi.

''Football-plus.az'' xəbər verir ki, son çempionun birdən-birə 4 futbolçusu sarı vərəqə alaraq cəzalı duruma düşdü. Söhbət Torreyra, Barış Alpər Yılmaz, Muslera və Əbdülkərim Bardakcıdan gedir. Növbəti tur İstanbul nəhəngini evdə sonuncu pillədə qərarlaşan ''Adana Dəmirspor''la oyun gözləyir. Aydın məsələdi ki, komanda autsayderin öhdəsindən bu futbolçular olmadan da gələ bilər. Sonra isə ''sarı-qırmızılar''ı Rizə səfəri və ardından evdə ''Fənərbaxça'' ilə mühüm derbi gözləyir. Yəni vacib oyunlar ərəfəsində komandanın liderləri bilərəkdən vərəqə limitini doldurdular. Bu məqam Türkiyə futbol ictimaiyyətində böyük müzakirələrə səbəb oldu.

Bu arada Türkiyə Futbol Federasiyasının Nizam-İntizam Komitəsinə sövq edilənlər arasında Əbdülkərim Bardakcı da var. Təcrübəli müdafiəçi bilərəkdən sarı vərəqə görməkdə günahlandırılır. O, bununla bağlı olan 37-ci maddəyə əsasən sövq edilib. Bu maddəyə görə futbolçuya maksimum 2 oyunluq cəza verilir. Qeyd edək ki, Əbdülkərim matçın son saniyələrində autu gec yerinə yetirdiyi üçün sarı vərəqə almışdı. Bundan başqa ''Qalatasaray''ın prezidenti Dursun Özbək ilə yönətici İbrahim Hatipoğlu ''futbolun etibarını zədələyən'' açıqlamalar üzündən NİK-ə sövq edilib.

Qeyd edək ki, daha öncə Türkiyədə buna bənzər olay 2021-ci ilin yanvarında yaşanmışdı. Həmin vaxt ''Fənərbaxça''nın şərəfini qoruyan Vedat Muriqi də bilərəkdən sarı vərəqə alma maddəsi ilə sövq edilmişdi. Maraqlıdı ki, o da bunu ''Qaziantep''lə oyunda etmişdi. Amma həmin vaxt federasiya kosovolu forvarda cəza verməyə ehtiyac görməmişdi.

ƏLİ