Türkiyə Futbol Federasiyasının nəzdində fəaliyyət göstərən Nizam-İntizam Komitəsi ötən tur üçün cəzaları açıqlayıb.

Football-plus.az xəbər verir ki, “Qalatasaray”lıların hansı cəzaları alacağı böyük maraq doğururdu. Çünki “Alanyaspor”a qarşı başıbəlalı oyunda (2:2) komandanın 2 futbolçusu qırmızı vərəqə almışdı. Oyundan sonra isə həm baş məşqçi Okan Buruk, həm idarə heyətinin üzvü və başqan vəkili Ərdən Timur, həm də başqan Dursun Özbək hakim Əli Palabıyıkı, eləcə də federasiyanı yıxıb-sürümüşdü. Qırmızı vərəqə alan oyunçulardan Saşa Boe NİK-ə sövq edilmədiyi üçün ona əlavə cəza verilməyib. Fransalı futbolçu yalnız dünən keçirilən “Fatih Karagümrük”ə qarşı oyunu buraxmalı oldu və növbəti tur meydanda olacaq. Digər “qızaran” futbolçu Əbdülkərim Bardakçıya isə 2 oyunluq cəza verilib. Okan Buruk 52 min lirə para cəzası alıb. Sərt açıqlamaları ilə diqqəti çəkən Ərdən Timur isə 21 günlüyə səlahiyyətlərini icra etməkdən məhrum olunub. Ona eyni zamanda 50 min lirə para cəzası da verilib.

“Qalatasaray”ın bu cəzalara görə Apellyasiya Komitəsinə şikayət edəcəyi gözlənilir. Rəhbərlik ilk növbədə Əbdülkərimin 2 oyunluq cəzasının 1 oyuna endirilməsini istəyir. Çünki cəza qüvvədə qalacağı təqdirdə bu müdafiəçi növbəti tur “Beşiktaş”a qarşı keçiriləcək prinsipial derbini buraxmalı olacaq. Bu arada cəzaların açıqlanmasının ardından “Adana Dəmirspor”un qalmaqallı başqanı Murat Sancakın Ərdən Timurla bağlı paylaşımı maraq doğurub. “Daha öncə 75, 421, 90 və 45 günlük cəzalar alan bir başqan kimi söyləyirəm, üzülmə Ərdən qardaşım, vaxt tez gəlib keçir” ifadəsini yazan Sancak bunun yanına bir neçə gülüş smayliki də əlavə edib.