Dünən Türkiyə çempionatının 17-ci turunda lider ''Fənərbaxça'' səfərdə 3-cü pillədəki ''Kayserispor'' üzərində 4:3 hesablı çətin, amma vacib qələbə qazandı.

"Football-plus.az" xəbər verir ki, görüşün son saniyələrində İstanbul nəhəngində birdən-birə iki futbolçu hakimə etiraza görə meydandan qovuldu. Əvvəlcə Fred, sonra da Mərt Hakan Yandaş ikinci sarı vərəqəni alaraq komandanı azlıqda qoydu. Gələn tur isə dekabrın 24-ü bilindiyi kimi ''Fənərbaxça''nı ''Qalatasaray''a qarşı prinsipial oyun gözləyir.

Düzdü, Yandaş əsas heyət üzvü sayılmırdı. Amma Fred ''sarı-lacivərdlilər'' üçün derbidə çox böyük itki olacaq. Təcrübəli braziliyalı futbolçunun matçın ardından sosial şəbəkədə ''hər kəs bizə qarşı olsa da, evimizə 3 xalla dönürük. Təşəkkürlər Tanrım'' paylaşımı diqqət çəkib. Fredin hakimə həmin epizodda konkret nə dediyi bilinmir. Amma ''sambaçı'' komanda yoldaşlarına hakimə qarşı qətiyyən təhqiramiz ifadə işlətmədiyini deyib.

Bu arada Fredin dekabrın 29-dakı derbidə oynayıb-oynamayacağı məsələsi də gündəmə gəlib. Həmin tarixdə ''Fənərbaxça'' ilə ''Qalatasaray'' bu dəfə Səudiyyə Ərəbistanında Türkiyə superkuboku çərçivəsində qarşılaşacaq. TFF-nin intizam təlimatnaməsində qeyd olunub ki, qırmızı vərəqə alan futbolçu 4 oyundan az cəza aldıqda, həmin cəzanı yalnız öz kateqoriyasında çəkir. Yəni kubok oyunundakı qırmızı vərəqə digər turnirlərə şamil olunmur. Amma cəza 4 oyundan artıq olduqda bütün turnirlərə aid olunur. Fredin cəzası böyük ehtimalla 1 oyun olacaq. Bu üzdən o, dekabrın 29-dakı derbidə iştirak edə biləcək.