''Barselona''nın iki aparıcı futbolçusu - Robert Levandovski ilə Joao Kanselonun başı ağrıya bilər.

Bilindiyi kimi La Liqanın son turunda ''Barsa'' öz meydanında ''Las Palmas''ı minimal hesabla məğlub etdi. Həmin qarşılaşmanın son anlarında Levandovski ilə Kanselonun aldığı sarı vərəqələr diqqət çəkdi. Hər iki futbolçunun bu oyuna qədər 4 sarı vərəqəsi var idi. Yəni daha bir sarı vərəqə onları cəzalı duruma salacaqdı. 81-ci dəqiqədə Levandovski əvəzlənərkən qəribə hərəkətlər etdi. O, əvvəlcə meydanı tərk etmək istəməyərək uzun müddət hakimə baxdı. Hakim Mateo Busketsin də ona sarı vərəqə göstərməkdən başqa çarəsi qalmadı. Eyni şəkildə 88-ci dəqiqədə Kanselo da vaxtı uzadaraq sarı vərəqə aldı. Bu da o deməkdi ki, hər iki futbolçu 31-ci turda ''Kadis''lə oyunu buraxacaq. Amma bu cəza hərtərəfli şəkildə hər iki futbolçuya sərf edir. Birincisi, ''Kadis''lə oyun PSJ ilə ÇL-dəki 1/4 final duelinin düz arasına düşür. Yəni həm Kanselo, həm də Levandovski ÇL həftəsində əlavə olaraq istirahət edəcək. İkinci məqam isə odu ki, 32-ci turda ''Barsa''nı səfərdə ''Real'' ilə ''El Klasiko'' gözləyir. Yəni cəzasını 31-ci turda çəkəcək hər iki futbolçu Madriddəki oyunda meydana çıxacaq. İspaniyanın əsas nəşri sayılan ''Marka'' bu məsələni gündəmə gətirərək hər iki futbolçuya cəza verilməsini tələb edib. Federasiyanın intizam kodeksinə əsasən bilərəkdən sarı vərəqə aldığı sübuta yetirilən futbolçuya əlavə 1 oyunluq cəza nəzərdə tutulub. Kanselo ilə Levandovski hələ ki, Nizam-İntizam Komitəsinə sövq edilməyiblər. Amma şaiyələrə inansaq, ''Marka''nın bununla bağlı xəbərindən sonra komitə məsələni araşdırmağa başlayıb.

ƏLİ