Dünən Avropa ölkələrinin böyük əksəriyyətində ''transfer pəncərəsi'' bağlandı. Son gündə sürpriz transferlərldən birini də ''Ayntraxt'' reallaşdırdı.

''Football-plus.az'' xəbər verir ki, Frankfurt təmsilçisi ''Qalatasaray''ın forvardı Mişi Batşuayini heyətinə qatdı. Düzdü, ''Qalatasaray'' heyətini Ahmed Kutucu və Alvaro Morata kimi hücum oyunçuları ilə gücləndirmişdi. Amma Batşuayinin bu qış komandanı tərk edəcəyi gözlənilmirdi. Özü də o, ''Cim-Bom''a ötən yay əzəli rəqib ''Fənərbaxça''dan gəlmişdi.

31 yaşlı belçikalı forvardın adı son günlər ''Betis''lə yanaşı hallanırdı. Amma o transferin son günündə İspaniyaya yox, Almaniyaya yollanmağa üstünlük verdi. Tanınmış forvard yeni klubu ilə 2,5 illik müqavilə imzaladı. ''Qalatasaray'' bu satışdan 3 milyon avro qazanacaq. Müqavilədə 500 min avro həcmində bonus da nəzərdə tutulub.

Qeyd edək ki, Batşuayi mövsümün əvvəlində ''sarı-qırmızılar''a sərbəst futbolçu statusunda gəlmişdi. Beləcə Batşuayinin Türkiyə macərası 3,5 ildən sonra başa çatmış oldu. O, Türkiyəyə ilk dəfə 2021-in yayında ayaq basmışdı. Bu müddət ərzində bir mövsüm ''Beşiktaş''ın, iki mövsüm ''Fənərbaxça''nın və yarım mövsüm ''Qalatasaray''ın şərəfini qorumuş oldu.

Batşuayi hər üç İstanbul nəhəngində forma geymiş ilk əcnəbi futbolçu kimi adını Türkiyə futbolu tarixinə yazdırdı. Onun bu mövsüm ''Qalatasaray''ın heyətində 30 rəsmi oyunda aktivinə 7 qol, 2 məhsuldar ötürmə yazdığını bildirək.

ƏLİ