Ahmed Kutucu ilə kifayətlənmək istəməyən və hücumu bir qədər də gücləndirmək niyyətində olan ''Qalatasaray'' dünya ulduzunu heyətinə qatmaq üzrədi.

''Football-plus.az'' xəbər verir ki, söhbət Alvaro Moratadan gedir. Son iki gündə ''Milan''la danışıqlar aparan Türkiyə çempionu həm klubla, həm də futbolçunun özü ilə anlaşma əldə edib. Transferin tamamlanması üçün artıq bütün şərtlər qəbul edilib. Bu xəbəri tanınmış insayder Fabritsio Romano paylaşıb.

Moratanın hətta şənbə günü axşam saatlarında özəl təyyarə ilə İstanbulda olacağı gözlənilirdi. ''Sarı-qırmızılar'' 32 yaşlı futbolçunu 6 aylığa icarəyə götürəcəklər. Müqavilədə daimi əsasda transfer maddəsi də mövcuddu. ''Qalatasaray'' bu maddədən yararlanmaq istəsə, yayda ''Milan''a 8 milyon avro ödəyəcək. İstanbul nəhənginin ödəyəcəyi icarə haqqı barədə isə məlumat yoxdu.

Morata ''Real''ın yetirməsidi və karyerasına da bu klubda start verib. ''Real''dan başqa ''Yuventus'', ''Çelsi'' və ''Atletiko''da top qovub. ''Milan'' təcrübəli futbolçunu 2024-ün yayında 13 milyon avroya heyətinə qatmışdı. Amma ispaniyalı forvard bu mövsüm ümidləri doğrulda bilmədi. O, 25 rəsmi oyunda aktivinə yalnız 6 qol, 2 məhsuldar ötürmə yaza bilib.

Morata karyerasında önəmli titullar qazanıb. ''Real'' ilə iki dəfə La Liqanı, iki dəfə ÇL-i, ''Yuve'' ilə iki dəfə A seriyasını qazanan tanınmış futbolçu ötən il İspaniya yığması ilə Avropa Çempionatının qalibi oldu.

ƏLİ