Ötən mövsüm çempionluq mübarizəsində üz-üzə gələn əzəli rəqiblər “Qalatasaray”la “Fənərbaxça” bu dəfə transferdə rəqib olublar.

“Football-plus.az” xəbər verir ki, 2023/24-də Xəlil Dərvişoğlu, Sedrik Bakambu və Vinisius kimi forvardlardan istədiyi faydanı ala bilməyən, Ərdən Timur kimi ağıllı futbol adamının ayrılmasından sonra təşvişə düşən “Qalatasaray” çıxış yolunu “Fənər”in üzvünü transfer etməkdə gördü. Söhbət Mişi Batşuayidən gedir. Rəhbərliyin fikrincə, Batşuayi həm sonradan meydana çıxaraq oyunu gücləndirməyə, həm də lazım olanda Mauro İkardi ilə birlikdə irəlidə oynamağa qadirdi. Bir ara iddia edilmişdi ki, “Fənərbaxça”nın yeni baş məşqçisi Joze Mourinyo təcrübəli belçikalı forvardın komandada qalmasını istəyir. Amma hadisələrin axarı başqa mənzərəni ortaya qoydu. Batşuayinin “Fənər”lə müqaviləsinin müddəti iyunun 30-da başa çatacaq. Düzdü, müqavilədə birillik şərti anlaşma da mövcud idi. Amma futbolçu ötən “futbol ili”ndə start heyətində yetərli sayda oyuna çıxmadığından şərti anlaşma qüvvəyə minmədi. “Qalatasaray” rəhbərliyi ötən həftəsonu Batşuayinin meneceri ilə görüşərək hissə-hissə ödənilmək şərti ilə 3 milyon avro imza parası və illik 3 milyon avro maaş olmaqla üçillik müqavilə təklif etdi. “Fənər”in də maaş şərtləri eyni idi. Sadəcə, “sarı-lacivərdlilər” imza parası kimi 3 yox, 1 milyon avro təklif etdilər. 30 yaşlı futbolçu bir qədər düşünəndən sonra “Qalatasaray”ın təklifini qəbul etdi. O, çərşənbə günü Parisdə tibbi müayinədən keçirildi və “Cim-Bom”la ilkin anlaşma əldə etdi. Bundan dərhal sonra isə Əli Koçun yeni idarə heyətində yer alan Acun Ilıcalı bunları dedi:

Beləcə son iki ildə “Fənər”in uğurları üçün çalışan qaradərili futbolçu bir andaca camiədə düşmənə çevrildi. Komandanın azarkeş səhifələrində onunla bağlı qalmaqallı paylaşımlar edildi. Bundan başqa, “Fənər”in üç futbolçusu – Cengiz Ündər, Fred və Bekaonun Batşuayini təqibdən çıxarması diqqəti çəkdi. Futbolçunun həyat yoldaşı Ameli Maria dünən “instaqram”da bir paylaşım etdi. “Futbola görə ailəmi təhdid edənlərə, uşağımın ölməsini istəyənlərə yazıqlar olsun, sizin ailədən danışmağa haqqınız yoxdu. Allah bunların hamısını görür” ifadəsini yazan bu xanım çox keçmədən qalmaqallı paylaşımını sildi. “Qalatasaray” cəbhəsi isə hələ ki gözləməyə məcburdu. Rəsmi açıqlama yalnız iyunun 30-dan, yəni Batşuayinin “Fənər”lə müqavilə müddəti başa çatandan sonra veriləcək. İdarə heyətinin üzvü İbrahim Hatipoğlu “Batşuayi bəyəndiyimiz və danışıqlar apardığımız futboçudu. Amma futbolda rəsmi imzalar atılmadan heç nəyi dəqiq söyləmək olmaz” açıqlamasını verib. Batşuayinin 2021/22-ni “Beşiktaş”da keçirdiyini nəzərə alsaq, o, adını Türkiyə futbol tarixinə yazdırmağa çox yaxındı. Belə ki, Batşuayi həm “Beşiktaş”, həm “Fənərbaxça”, həm də “Qalatasaray”da oynamış ilk əcnəbi futbolçu kimi tarixə düşəcək. Forvard son iki mövsümdə “Fənər”də 75 rəsmi oyunda 44 qol, 5 məhsuldar ötürməlik performans sərgiləyib. “Beşiktaş”da isə o, 42 rəsmi oyuna çıxaraq 14 qol, 5 məhsuldar ötürmə ilə fərqlənmişdi.