“Qarabağ”da “metal yorğunluq” yaranıb. Məsələn, uzun illər fəaliyyətdə olan təyyarələrin hansısa problemi olmadığı halda qəza törədir. Buna “metal yorğunluq” deyirlər. Təbii ki, biz komandadan Çempionlar və ya Avropa Liqasında qalib gəlməsini istəmirik. Bunlar indiki məqamda nağıl kimi görünür. Əsas istəyimiz komandanın məzmunlu oyun, qrup (indiki əsas mərhələ nəzərdə tutulur – red.) və pley-off mərhələlərində uğurlu çıxış etməsidi. Buna da Tahir Gözəl, Qurban Qurbanov və futbolçular sayəsində dəfələrlə şahidlik etmişik. Belə ciddi uğuru hər il təkrarlamaq nəinki “Qarabağ”ı, azarkeşləri belə yora bilər. Daha çoxunu kim istəməz ki?! Bunun üçün dəyişikliklər olmalıdı. Məşqçi idarəçiliyində yeniliklər olmalıdı. Qurban Qurbanov artıq daha böyük klublarda çalışmalıdı. O, çox savadlıdı, futbolumuzun vacib simasıdı. İndi Qurban bəy Avropanın mötəbər klublarında öz sözünü deməlidi. Ola bilər ki, ifadələrim ictimaiyyət tərəfindən birmənalı qarşılanmasın. Subyektiv fikrimdi. Qurban Qurbanov İsveç, Türkiyə və Polşa kimi ölkələrdə Azərbaycanı uğurla təmsil etməlidi. “Qarabağ”dan daha çoxunu istəyiriksə, bu baş verməlidi. Komandanın ruhu dəyişməlidi. Qurban bəy ölkəmizdə əlindən gələni edib. “Beş” arzulayanlara “yeddi” bəxş edib”.