Dünən 11-ci turun "Araz-Naxçıvan" - "Qarabağ" oyununu izləyənlər arasında Naxçıvan təmsilçisinin sabiq mətbuat katibi Tahir Tahiroviç də var idi. O, matçboyu komandasını durmadan irəli səsləyirdi. Azər Bağırovun yetirmələrinin vurduğu qollar zamanı çılğıncasına sevinən Tahir bəylə ayaqüstü söhbət etdik.

- Bu gün çılğın azarkeş kimi sona qədər komandanıza dəstək verdiz.
- Əslində oyundan əvvəl də coşqulu, nikbin idim. İnanırdım ki, qalib gələcəyik. Hətta hesabın 2:1 olacağını da demişdim. Düzdü, ilk hissədə hər iki komandanın ifasında sönük oyun getdi. Fasilədən sonra yaxşı oynadıq. Hesabl açan tərəf olduq, ardından fərqi artırdıq. Təbii ki, 2:0 daha yaxşı olardı. Amma uzatma dəqiqələrində "Qarabağ" fərqi azaltdı. Əsas odu ki, həm proqnozum özünü doğrultdu, həm də "Araz-Naxçıvan" qalib gəldi (gülür).

- Qələbəyə əminliyiniz nədən idi?
- Çempionatın əvvəli bizim üçün uğursuz oldu. Çünki nə istədiyimiz transferlər həyata keçirmiş, nə də heyətimizi komplektləşdirə bilmişdik. Amma ümidimizi itirmədik. Oyundan-oyuna inkişaf etdik. 1-ci dövrədə də "Qarabağ"la səfərdə mübariz matç sərgiləmişdik. Yalnız son dəqiqələrdə heç-heçəni əldən verdik. Bundan başqa, son 10 oyunumuzu nəzərə alsaq, təkcə hesabda yox, həm də oyun planında rəqiblərimizi üstələyirik. Eləcə də baş məşqçimiz Azər Bağırov amilini də nəzərə alsaq, “Qarabağ”ı büdrədəcəyimizə inanırdım.

- Qarşıdakı oyunlarda Naxçıvan təmsilçisinin bu tempi qoruya biləcəyinə inanırsızmı?
- Əlbəttə.

- İndiki uğurları görəndə mətbuat katibi vəzifəsindən getdiyinizə görə peşmançılıq çəkirsizmi?
- Qətiyyən. Hansı vəzifədə olmağımdan asılı olmayaraq, nə qədər ki, "Araz-Naxçıvan" var, mən onun çılğın azarkeşi kimi daim dəstəyimi göstərəcəm və komandanın yanında olacam.

- Naxçıvan klubunun hazırkı uğurunun sirri nədədi?
- Uğurun başlıca memarı baş məşqçi Azər Bağırovdu. Azər müəllim hazırda Azərbaycanın 1 nömrəli məşqçisidi.

- Hətta Qurban Qurbanovdan da üstündü?
- Bir daha altını cızmaqla vurğulayıram: Mənə görə Azər Bağırov Azərbaycanın 1 nömrəli məşqçisidi.

- Uğurlarınızın davamı gələcəkmi?
- 100 faiz! Bu mövsüm mükafatçılar sırasında olacağımıza əminəm.

ABDULLA İSMAYILOĞLU