Türkiyə çempionatında əzəli rəqibi ''Fənərbaxça'' ilə amansız çempionluq mübarizəsi aparan ''Qalatasaray''la bağlı maraqlı transfer xəbəri var.

"Football-plus.az" xəbər verir ki, Serxio Oliveyranın zədələnərək bir neçə aylığa sıradan çıxması və Tanqi Ndombelenin ümidləri doğrultmaması üzündən dayaq yarımmüdafiəçisinə ehtiyac duyan İstanbul nəhəngi sabiq futbolçusunu geri çağırmaq qərarına gəlib. Söhbət Berkan Kutludan gedir.

Bilindiyi kimi bu futbolçu mövsümün əvvəlində 250 min avro qarşılığında A seriyası təmsilçisi ''Cenoa''ya birillik icarəyə verilmişdi. Amma ''Qalatasaray'' rəhbərliyi müqaviləyə bu futbolçunu istədiyi an geri çağırmaq hüququna malik olması barədə maddə saldırmışdı. Məhşur italiyalı insayder Fabritsio Romanonun xəbərinə görə Berkan önümüzdəki günlərdə İstanbula qayıdaraq ''Cim-Bom''un məşqlərinə qoşulacaq. 25 yaşlı futbolçu 2021-dən ''Qalatasaray''ın şərəfini qoruyur. İstanbul nəhəngində o, ümumilikdə 84 oyuna çıxaraq 1 qol, 5 məhsuldar ötürmə ilə fərqlənib. İtaliyada isə Berkan özünü yaxşı tərəfdən göstərə bilmədi. ''Cenoa''da o, cəmi 8 rəsmi oyunda ümumilikdə 328 dəqiqə forma geymək şansı qazandı.

ƏLİ