Fransa çempionatının 16-cı turunun irəli çəkilən oyununda ''Monako'' lider PSJ-ni qəbul etdi.

Fasiləyə geridə yollanan moneqasklılar ikinci hissənin əvvəllərində 2:1 önə keçdilər. Adi Hütterin komandası qalib gələcəyi təqdirdə xal fərqini 4-ə endirəcəkdi. Amma PSJ nahaq yerə Fransa futbolunun lideri sayılmadığını göstərdi və qalan müddətdə 3 qol vuraraq 4:2 hesablı inamlı qələbə qazandı. İlk yarının ortalarında isə çox qalmaqallı bir epizod yaşandı.

''Monako''nun müdafiəçisi Uilfrid Sinqo qonaqların qapıçısı Canluici Donnarummaya qarşı sərtliyə yox, hətta qəddarlığa yol verdi. O, topa zərbə endirmək istəyərkən italiyalı qapıçının üzünə zərbə vurdu. Qanlar içində qalan, ciddi xəsarət alan və üzünə bir neçə tikiş qoyulan Donnarumma oyunu tərk etməli oldu. Ən qəribəsi odu ki, hakim bu kobudluğa görə Sinqoya nəinki qırmızı, heç sarı vərəqə də göstərmədi!

VAR da nədənsə, məsələyə qarışmadı. Sinqonun bu epizodu vərəqəsiz tamamlaması, sosial şəbəkələrdə də çox böyük müzakirələrə səbəb oldu.