"Zirə" - "Sabah" qarşılaşmasının baş hakimi Fərid Hacıyev idi.

Lakin matç zamanı referi həddən artıq sərt oyuna imkan verirdi. Bununla yanaşı, ədalət təmsilçisinin qonaqlara simpatiyası hiss olunurdu. Oyunun mübahisəyə açıq epizodları 7-ci və 45+2-ci dəqiqəyə təsadüf etdi. "Sabah"ın müdafiəçisi Amin Seydiyev kobudluğa yol verdi. "2" nömrə öncə Andriya Lukoviçə, ardınca Hamidu Keytaya qarşı kobudluq etdi. 7-ci dəqiqədə serbiyalı futbolçuya qarşı açıq ayaqla müdaxiləyə görə referi Seydiyevə sarı vərəqə göstərsə də, Rəşad Sadıqov "qırmızı" tələb etdi. Keytaya qarşı kobudluğa görə isə, ümumiyyətlə, vərəqə göstərilmədi. Bu üzdən Murad Musayev riskə getməyərək fasilədən sonra müdafiəçini əvəzlədi. Hər iki hissədə dayanmalar çox olsa da, ilk hissəyə 2, ikinci hissəyə 3 dəqiqə əlavə etdi. Bu da təbii ki, meydan sahiblərinin etirazına səbəb oldu. Ədalət təmsilçilərinin idarəçiliyi birmənalı qarşılanmadı.

ABDULLA İSMAYILOĞLU