"Oyunun gərgin keçəcəyini əvvəlcədən bilirdik. Rəqibin güclü-zəif tərəflərini də təhlil edib, meydana çıxmışdıq. Mən bu vaxtda kimi heç vaxt hakimlik haqda danışmamışam. Amma təəssüf ki, dünən biz "Zaqatala"ya yox, hakimlərlə gücləndirilmiş rəqibə qarşı oynadıq. Ona görə də məcburam ki, hakimlərin bizə qarşı qara əməllərindən danışım. 90 dəqiqə ərzində baş hakim rəqibin xeyrinə qərarlar verdi. İlk hissədə zaqatalalı oyunçu futbolçumuzun ayağına açıq zərbəylə müdaxilə edir. Qırmızı vərəqəlik epizodda referi sarı ilə kifayətlənir. Rəqib komandanın oyunçuları ilk hissədən tempi aşağı salmaq üçün dəqiqələrlə özünü yerə atırdı, amma hakim buna görə futbolçulara rəsmi xəbərdarlıq etmirdi. 81-ci dəqiqədə hesabda 0:1 geridə olarkən sürətli hücum təşkil edib qapıya zərbə endirdik. Top tirə dəyib qapı xəttini keçdi, laysmanlar və baş hakim bunu görməzdən gəldi. Epizodun davamında futbolçumuz qayıdan topa başla zərbə endirib tora daxil edir, amma ədalət təmsilçiləri ədalətsizliklə bunu oyundankənar vəziyyət kimi qiymətləndirir. Həmin epizoda dəfələrlə baxdım, onlarla futbol mütəxəssisnə də göstərmişəm, görənlər deyir ki, hakim səhv qərar verib. Qırmızı vərəqəyə gəlincə, bu sırf hakim idarəçiliyinə etirazla bağlı idi. Qərəzli idarəçilik futbolçularımın əsəblərini pozdu. Məhz buna görə Ruslan Vorontsovla ehtiyatda olan qapıçımız Amil Orucova “qırmızı” göstərildi. Oyundan sonra hakimlərə də epizodu göstərib etirazımızı bildirdim. Danışılacaq çox şey var. Nə deyim bilmirəm. Qısası, hakimlər Yevlağa gələrək bütün əziyyətimizi yerə vurdu, rəqibin qələbə qazanması üçün hər şey etdi".