Mövsümə superkubokda ''Qalatasaray''ı 5:0 yenməklə, eləcə də ilk 3 turda maksimum xal toplamaqla başlayan ''Beşiktaş''da baş məşqçi Covanni van Bronkhorstun ''kreslosunun'' artıq noyabrın sonlarında laxlamağa başlayacağını az adam proqnozlaşdırardı. Amma uğurlu başlanğıca və ilk 8 turda uduzmamasına baxmayaraq İstanbul nəhəngi davamını gətirə bilmədi.

Son 4 turda 12 mümkün xaldan cəmi 1-ni qazanan ''ağ-qaralar'' artıq liderdən 13 xal geridədi. ''Göztəpə''yə qarşı evdəki son oyunun 2:0-dan 2:4-ə çevrilməsindən sonra Van Bronkhorst çox ciddi tənqid atəşinə tutulub. Ötən tura qədər daim niderlandlının arxasında duran rəhbərliyin də ona güvəni sarsılmağa başlayıb. ''Göztəpə'' ilə oyundan sonra idarə heyətinin keçirdiyi təcili toplantıda qəbul edilən qərar məlum olub. Belə ki, Van Bronkhorsta vəziyyəti düzəltmək üçün iki oyunluq vaxt verilib. Qarşıdakı iki matçda ''Beşiktaş'' əvvəlcə Macarıstanda Tel-Əviv ''Makkabi''si ilə qarşılaşacaqsa, həftəsonu komanda ''Hatayspor''un qonağı olacaq.

Bu oyunlarda da məğlubiyyətlər qeydə alınacağı təqdirdə Van Bronkhorst qovulacaq. Bu məşqçiyə yönələn əsas narazılıq onun oyunçulara həddən artıq çox istirahət verməsi ilə bağlıdı. Xüsusilə komandanın uduzduğu oyunlardan sonra məşqçinin oyunçulara bir günlük istirahət verməsi Türkiyə futbolu üçün yenilikdi. Tənqidlərə baxmayaraq Van Bronkhorst bu ənənəni davam etdirir. ''Göztəpə''yə qarşı bazar günkü məğlubiyyətə baxmayaraq komanda bazar ertəsi istirahət etdi. Özü də nəzərə alaq ki, artıq çərşənbə axşamı ''Makkabi'' ilə oyun var. Hər halda hazırlaşmaq üçün zaman onsuz da azdı və bazar ertəsini daha səmərəli keçirmək olardı. 49 yaşlı mütəxəssisin yığma fasilələrindən istifadə edərək tez-tez vətəninə yollanması da birmənalı qarşılanmır.

Mövsümün əvvəlindən o artıq iki dəfə Niderlanda uçub və ümumilikdə orda 12 gün keçirib. Onun olmadığı günlərdə məşqləri köməkçiləri Jan pol van Qastel və Sərdar Topraktəpə keçir. Van Bronkhorstun ''Beşiktaş''la 2026-ya qədər müqaviləsinin olduğunu bildirək. Onun illik maaşı 1,4 milyon avrodu.

ƏLİ