“Beşiktaş”ın Covanni van Bronkhorstla anlaşdığını xəbər vermişdik.

Bu anlaşmanın bəzi pərdəarxası detalları məlum olub. Sərgən Yalçının adının uzun müddət klubla yanaşı hallanmasına baxmayaraq əcnəbi məşqçi ilə çalışmaq istəyən rəhbərlik üç namizəd – Ule-Qunnar Sulşer, Slaven Biliç və Van Bronkhorst arasında seçim edərək məhz sonuncuya üstünlük verdi. 49 yaşlı mütəxəssislə ilk dəfə hələ dekabrın 30-da əlaqə qurulmuşdu. O vaxt niderlandlı çalışdırıcı koməkçilərini toplaya bilmədiyi üçün tərəflər anlaşa bilməmişdi. Amma o vaxtdan bəri Van Bronkhorstla “Beşiktaş”ın əlaqəsi qırılmadı. Məşqçi komandanın oyunlarını izləməkdə davam etdi. Hətta kubokdakı qələbənin ardından o, başqan Hasan Arata təbrik mesajı da göndəribmiş.

Sulşerin illik 3,2 milyon avro maaş istəməsi, üsətlik başqa tələblərinin olması, Biliçin namizədliyinin isə idarə heyəti tərəfindən dəstəklənməməsi üzündən Arat sonda Van Bronkhorsta üstünlük verdi. Məşqçi özü də başqa təklifləri rədd etdi. Məsələn, Van Bronkhorstun sabiq klubu “Feynoord” ona ciddi maraq göstərirdi. Rotterdam təmsilçisi “Liverpul”a yollanan Arne Slotu məhz Van Bronkhorstla əvəzləmək istəyirdi. Üstəlik bu məşqçi yaxın keçmişdə bu klubla çempion da olmuşdu. Amma Van Bronkhorst İstanbul nəhənginə üstünlük verərək “2+1“ illik müqaviləyə imza atdı. Onun Türkiyədə illik 1,4 milyon avro qazanacağını da bildirək. Müqayisə üçün deyək ki, Joze Mourinyo “Fənərbaxça”da illik 10,5 milyon avro qazanacaq!

Bu arada “Beşiktaş”ın əcnəbi bir idman direktoru axtarışı da davam edir. Ötən sayımızda “ağ-qaralar”ın bu vəzifə üçün “Qalatasaray”ın sabiq qapıçısı Morqan De Sanktislə anlaşa bilmədiyini xəbər vermişdik. Maraqlıdı ki, “Qartal”ın danışıqlar apardığı digər isim də “Qalatasaray”ın sabiq qapıçısıdı. Bu dəfə söhbət Bred Frideldən gedir. Şayiələrə inansaq, 53 yaşlı futbol adamı ilə artıq ilkin razılıq əldə olunub. Bəzi mənbələr iddia edir ki, Fridel klubda futbolçuların satışı ilə məşğul olacaq və üstəlik qlobal bir skaut sistemi qurmağa çalışacaq. Hərçənd indiyə qədər onun belə bir iş təcrübəsi olmayıb. Fridel daha öncə ABŞ-ın U-19 yığmasının, eləcə də MLS təmsilçisi “Nyu İnqlend”in baş məşqçisi olub. ABŞ futbolunun ən tanınmış simalarından olan Fridel bir mövsümü – 1995/96-nı “Qalatasaray”da keçib. İstanbul nəhəngindən başqa o, “Kolambus”, “Liverpul”, “Blekbern”, “Aston Villa” və “Tottenhem”də çıxış edib.