Baş məşqçi postuna Covanni van Bronkhorstu gətirən “Beşiktaş”da məşqçilər korpusuna yeni isim əlavə olunub.

“Football-plus.az” xəbər verir ki, “Deyli Rekord” nəşrinin iddiasına görə, Van Bronkhorstun istəyi ilə yeni mövsümdə Anton Makelhoun da İstanbul nəhəngində çalışacaq. Van Bronkhorst 43 yaşlı bu şotlandiyalı məşqçini “Reyncers”i çalışdırıdığı dönəmdən tanıyır. Makelhoun sonuncu dəfə Şotlandiyanın çempionşipində mübarizə aparan “Kuinz Park”ın akademiyasının rəhbəri qismində çalışırdı. O, daha öncə “Hibernian”, “Tottenhem”, “Nyu İnqlend” və “Seltik” kimi klublarda ümumilikdə 20 il müxtəlif vəzifələri icra edib. “Beşiktaş”da o, Van Bronkhorstun əsas köməkçilərindən biri olacaq.

Onu da bildirək ki, niderlandlı mütəxəssis İstanbula iyunun 27-də ayaq basacaq. Komanda yeni mövsümün hazırlığına iyulun 1-dən etibarən start verəcək. “Qartal” təxminən 10 gün öz bazasında hazırlıq keçdikdən sonra Sloveniyaya yollanacaq. “Ağ-qaralar” iyulun 10-20-si aralığında Mariborda toplanış keçəcək. Hazırlıq oyunlarındakı rəqiblər daha sonra açıqlanacaq. Komanda bu toplanışda üç yoxlama matçı keçirərək vətənə qayıdacaq. Transfer mövzusuna gəlincə, hələ ki “Beşiktaş” yalnız braziliyalı müdafiəçi Qabriel Paulistanın keçidini rəsmiləşdirib. Rəhbərlik Sloveniya toplanışına qədər daha bir mərkəz müdafiəçisi və bir hücumameyilli futbolçunun transferini tamamlamaq istəyir. Bu arada Van Bronkhorsta heyətdəki futbolçularla bağlı yekun qərar vermək üçün iyunun 9-na qədər vaxt verilib. Məhz həmin gün 49 yaşlı mütəxəssis yerli və əcnəbi futbolçular ilə bağlı rəhbərliyə geniş bir raport təqdim edəcək.