Türkiyə Futbol Federasiyasının indiki başqanı İbrahim Hacıosmanoğlunun sabiq başqan Mehmet Büyükekşini məhkəməyə verməyə hazırlaşdığı məlum olub.

Hacıosmanoğlu bu vəzifəyə gələn kimi Maliyyə Komitəsini tam tərkibdə dəyişdirdi. Daha sonra isə qurumun maddi durumunun ən xırda detallara qədər araşdırılması üçün bir şirkətlə anlaşdı. Həmin araşdırmanın nəticəsi ortaya gözlənilməz məqamların çıxmasına səbəb olub.

Məsələn, Büyükekşinin dönəmində TFF-nin 5 milyon lirə gəlir əldə etdiyi ictimaiyyətə açıqlanmışdı. Amma bunun yalan məlumat olduğu üzə çıxıb. Federasiyanın əksinə 763 milyon lirə ziyana uğradığı üzə çıxıb.

Deyilənə görə sponsorluq anlaşmalarından TFF-nin büdcəsinə heç bir məbləğ daxil olmayıb. Bundan başqa 2023-cü ildəki bəzi gəlirlərin 2024-cü ildə əldə olunduğu qeyd olunub. Hacıosmanoğlunun fikrincə, bütün bunlar Büyükekşinin və əvvəlki idarə heyətinin fırıldağıdı.

Ona görə də indiki başqan əvvəlki başqanı ''vəzifədən başqa məqsədlər üçün istifadə'' və ''ictimaiyyətə yalan məlumat çatdırmaq'' ittihamları ilə məhkəməyə vermək niyyətindədi.

ƏLİ