Son çempion statusunda olmasına baxmayaraq zəif mövsüm keçirən və yeni prezidentini seçməyə hazırlaşan ''Trabzonspor'' son xəbərlərlə bir qədər də sarsılıb.

"Football-plus.az" xəbər verir ki, 10 futbolçunun meneceri pulunu ala bilmədiyinə görə ''Trabzonspor''u məhkəməyə verib.

Onlardan 5-i - Mark Bartra, Mahmud Trezeqe, Dorukhan Toköz, Yusuf Ərdoğan və Batuhan Kör bir müddət öncə istefa verən Abdulla Avcının dönəmində transfer olunub. Bu futbolçuların bağlı olduqları menecerlik şirkətləri Bartraya görə 15 milyon lirə, Trezeqeyə görə 6,1 milyon lirə, Yusuf Ərdoğana görə 925 min lirə, Dorukhan Toközə görə 737 min lirə və Batuhan Körə görə 381 min lirə alacağının olduğunu bildirərək məhkəməyə üz tutub.

Onsuz da maddi cəhətdən çətin durumdan keçən Trabzon təmsilçisinə başqa menecerlərdən də şok xəbər gəlib. Abdülkadir Ömür ilə artıq klubdan ayrılan Abdülkadir Parmakın meneceri Necdet Ergezen eyni üsulla klubdan 7,5 milyon lirə tələb edir. ''Base Soccer Agency'' menecerlik şirkətinin iddiasına görə isə ''Trabzonspor'' onlara hələ ötən ilin oktyabrın 15-nə qədər 3,1 milyon lirə ödəməli idi.

Bundan başqa Andres Kornelius özü azmış kimi meneceri də pulunu tələb edir. Ötən mövsümkü çempionluqda böyük rol oynayan və yayda klubdan ayrılan danimarkalı forvard zatən çoxdan trabzonlulardan şikayət edib. Onun məsələsinə hələ də baxılır. İndi də Korneliusun meneceri gecikmiş pulu faizləri ilə birlikdə tələb edir. Onun iddiasına görə klubun ona təxminən 5 milyon lirə borcu var. Faizlərlə birlikdə bu məbləğ 6,4 milyon lirəyə çatır.

Hazırda icarə əsasında ''Kasımpaşa''da forma geyən Fode Koytanın menecerlik şirkəti isə 3,3 milyon lirəyə görə məhkəməyə üz tutub.

ƏLİ