Türkiyə Futbol Federasiyasında prezident seçkisinə bir həftədən də az qalıb.

İyulun 18-də qurumda növbədənkənar seçki baş tutacaq. Seçkiyə bu qədər qısa müddət qalmasına baxmayaraq, qəribə olaylar baş verir. Bilindiyi kimi, başqanlığa 5 namizəd var idi. Daha öncə Ərdal Alkış, İbrahim Hacıosmanoğlu, İsmayıl Uyanık və Sərvət Yardımcı namizədliyini açıqlamışdısa, ən son hazırki başqan Mehmet Büyükekşi də namizədliyini irəli sürmüşdü. Amma srağagün birdən-birə iki nəfər namizədliyini geri çəkdi. Bunlardan biri İsmayıl Uyanıkdı. Hərçənd “Samsunspor”un sabiq prezidentinin şanları onsuz da yüksək qiymətləndirilmirdi. O, lazımi sayda imza toplaya bilmədiyi üçün geri çəkildiyini açıqladı. Amma Sərvət Yardımcının da namizədliyini geri çəkməsi aydın səmada şimşək effekti verdi. Çünki uzun illərdi UEFA-nın İcraiyyə Komitəsinin üzvü olan və böyük təcrübəyə malik Yardımcının ciddi planları var idi. Onu “Fənərbaxça” və “Beşiktaş” başda olmaqla bir çox klub dəstəkləyirdi. Amma Büyükekşinin əsas rəqibi olacağı gözlənilən Yardımcı yazılı bir açıqlama verərək hər kəsi şoka saldı. O, namizədliyini irəli sürdüyü gündən bəri özü, ailəsi, əməkdaşlıq etdiyi yaxın insanlar barədə sosial şəbəkələrdə yalan məlumatlar paylaşıldığını vurğuladı. Özünün və ailəsinin şəxsiyyətinə, qüruruna toxunan sözləri qəbul etmədiyini vurğulayan futbol adamı təkcə namizədliyini geri çəkməklə kifayətlənmədi. O həm də 7 ilə yaxındı davam edən UEFA İK-nın üzvlüyündən istefa verdiyini də futbol ictimaiyyətinə çatdırdı.

Türkiyəli həmkarlarımızın iddiasına görə, bu məsələ kənardan göründüyü qədər sadə deyil. Şayiələrə inansaq, işin içinə siyasət daxil olub. Belə ki, Sərvət Yardımcını hətta İstanbul Böyükşəhər Bələdiyyəsinin başqanı Əkrəm İmamoğlu da dəstəkləyirdi. İmamoğlunun sayəsində Yardımcı siyasi partiyalardan da dəstək görürdü. Amma ölkə prezidenti Rəcəp Tayyib Ərdoğanın Mehmet Büyükekşini dəstəkləməyə qərar verməsinin ardından hər şey dəyişdi. Deyilənə görə, Sərvət Yardımcıdan namizədliyini geri çəkməyi məhz Ərdoğan tələb edib. Düzdü, ölkə prezidenti bir müddət öncə verdiyi müsahibədə federasiyada sabitliyin tərəfdarı olduğunu vurğulamışdı. Amma Büyükekşidən narazılıqlar çox idi. Elə ötən il dekabrın sonlarında Səudiyyə Ərəbistanında keçirilməsi planlaşdırılan superkubok matçının təxirə salınmasının ardından güman olunurdu ki, Ərdoğan özü də Büyükekşinin vəzifəsindən getməsini istəyir. Ən əsası Büyükekşinin qardaşının adı FETÖ ilə yaxın əlaqədə hallandırılır.

Bütün bunlara baxmayaraq, Ərdoğan qəribə şəkildə Büyükekşini dəstəkləmək qərarına gəlib. Düzdü, “Trabzonspor”un sabiq prezidenti İbrahim Haciosmanoğlu heç bir halda namizədliyini geri çəkməyəcəyini qeyd edib. Amma o, Büyükekşiyə problem yarada biləcək rəqibə oxşamır. Yəni indidən seçkinin formal xarakter daşıyacağını və rəqibsiz görünən Büyükekşinin qalib gələcəyini iddia etmək mümkündü.