“Qalatasaray”ın son imzaladığı sponsorluq anlaşmalarından əldə edəcəyi gəlir bəlli olub. Bilindiyi kimi, İstanbul nəhəngi bugünlərdə həm forma, həm də stadion ilə bağlı sponsorluq müqavilələri imzalamışdı.

"Football-plus.az" xəbər verir ki, ötən mövsüm olduğu kimi, yeni mövsümdə də komandanın formasının üzərində maşınların icarəsi ilə məşğul olan “Sixt” şirkətinin adı yazılacaq. Bu anlaşma “sarı-qırmızılar”a 195 milyon lirə qazandıracaq.

Komandanın ev oyunlarını keçirdiyi “Əli Sami Yen” idman kompleksində yerləşən stadionun sponsoru isə bundan sonra “Rams Global” şirkəti olacaq. Arena artıq “Rams Stadionu” adlanacaq! Daşınmaz əmlak, tibb, turizm, media kimi fərqli sahələrdə fəaliyyət göstərən “Rams Global” ilə beşillik müqavilə imzalanıb. Bunun qarşılığında ilk mövsümdə klubun büdcəsinə 213,6 milyon lirə daxil olacaq. Başqa sözlə desək, bu iki anlaşma 2023/24-də “Qalatasaray”a ümumilikdə 408,6 milyon lirə qazandıracaq ki, bu da təxminən 14,5 milyon avro deməkdi! Xatırladaq ki, 2011-də istifadəyə verilən stadion ilk 10 ildə “Türk Telekom” adlanırdı. 2021-də isə “Qalatasaray” öz yönəticisi Ərdən Timura məxsus olan NEF şirkəti ilə anlaşdığından son 2 ildə arena “Nef Stadionu” adlanırdı.

Yeri gəlmişkən, Acun Ilıcalının sahibi olduğu çempionşip təmsilçisi “Hall Siti” dünən Türkiyəyə gəlib. “Pələnglər” burda iki yoxlama matçı keçirəcək. Ayın 5-də “Qalatasaray”, 9-da isə “Hatayspor”la oyunlar nəzərdə tutulub. İngilislər bu müddətdə Türkiyə yığmasının Rivada yerləşən bazasında qalacaqlar və məşqləri də burda keçəcəklər. “Qalatasaray”la “Hall Siti” arasında dostluq matçı sabah Kocaelidə keçiriləcək və Bakı vaxtı ilə saat 20.45-də başlayacaq. Oyunu ya “Qalatasaray TV”, ya da komandanın “yutub” kanalı canlı yayınlayacaq. “Hall Siti”nin “Hatayspor”a qarşı oyunu isə Bursada keçiriləcək. Bu, zəlzələdən sonra Türkiyə çempionatında çıxışını dayandıran Hatay təmsilçisinin fevralın əvvəllərindən bəri keçirəcəyi ilk qarşılaşma olacaq.

ƏLİ