İspaniya futbolunun əsas nəhəngləri yığma fasiləsi ərəfəsində xal itirmədi.

“Real” özü üçün münasib rəqib sayılmayan “Vilyarreal”ı iki cavabsız qolla məğlub etdi. “Barselona” basklar ölkəsində Levandovskinin het-triki sayəsində qalib gəldi. “Atletiko” isə San-Sebastyanda qələbəni əldən verdi.

“Osasuna” ilə oyundakı gözlənilməz büdrəmədən sonra “Barselona” qələbə yoluna qayıtdı. “Alaves” kataloniyalılar üçün münasib rəqibdi, qonaqlar bu dəfə artıq ilk yarının ortalarında qələbəni təmin etdi. Debütdə hakim Rafinyanın vurduğu qolu saymasa da, bundan dərhal sonra Levandovski qaydalar çərçivəsində fərqləndi. Ancaq polşalı hücumçu bir qolla kifayətlənmədi, cəmi 25 dəqiqə ərzində het-trik etdi. Bununla da oyunun taleyi həll olundu. Düzdü, meydan sahibləri əlini yanına salmadı. Yaxınlarda “Real”la oyunda az qala 0:3-dən sonra hesabı bərabərləşdirən “Alaves” yenə xarakter göstərdi – ilk yarının sonunda qonaqlar müdafiədə çətinlik çəkdi.

Martines hətta “Barsa”nın qapısına yol da tapdı, ancaq onun vurduğu qol ofsayd üzündən sayılmadı. 2-ci hissənin əvvəlində isə qapı çatı qonaqların köməyinə çatdı. “Barselona” fasilədən sonra praqmatik üslubda oynadı, hərçənd bir neçə perspektivli hücum da qurdu, sonradan meydana çıxan Fati az qala fərqlənəcəkdi. Yetərincə baxımlı hücumlar quran meydan sahibləri tez-tez ofsayda düşürdü. Məhz bu üzdən Mourinyonun sonda vurduğu qol da sayılmadı. “Barsa” bu qələbə sayəsində yenə “Real”la 3 xal fərqini qorudu və yığma fasiləsinə yaxşı əhval-ruhiyyədə yollandı. Ardıcıl 3-cü oyunda uduzan “Alaves” isə 14-cü pilləyə yuvarlandı.

“Real” mövsümə yaxşı başlayan “Vilyarreal” üzərində inamlı qələbə qazandı. Meydan sahibləri oyunun əvvəlində ev tapşırığından yararlandı: Modriç künc zərbəsini yerinə yetirdi, Bellingem bilərəkdən topu buraxdı və Valverde dəqiq zərbə ilə topu qapıya göndərdi. Valensiyalılar dərhal “status-kvo”nu bərpa edə bilərdi. Pepenin baş zərbəsindən sonra tir Luninin köməyinə çatdı, Barrinin zərbəsində isə dəqiqlik çatmadı. Fasilə ərəfəsində Vinisius Mbappenin fərqlənməsi üçün hər şey etdi, ancaq fransalı ulduz təkbətəkdən yararlana bilmədi.

Fasilədən sonra “sarılar” üçlü əvəzləməyə qədər, demək olar ki, Luninin qapısı önündə görünmədi. Amma Vinisius 73-cü dəqiqədə dəqiq zərbə ilə intriqanı öldürdü. İki oyunçunun zədələnməsi Ançelottinin əhvalını korladı. Vinisiusun zədəsi o qədər ciddi deyil, ancaq Karvaxal 8-10 aylığa sıradan çıxdı.

Tura San-Sebastyanda yekun vuruldu. “Atletiko” “Real Sosyedad”la oyuna Çempionlar Liqasındakı Lissabon fiaskosunu unutdurmaq üçün çıxmışdı. “Benfika”dan 4 qol buraxan “hindular” bu dəfə etibarlı oynadı. Üstəlik hələ ilk dəqiqədə hesabı açdılar. Qrizmann rəqibin cərimə meydançasında Alvaresə dabanla ötürmə verdi, o isə topu uzaq küncə göndərdi. Basklar tezliklə özünə gəldi. Oblak Subimendi ilə Aqerdin təhlükəli zərbələrini qaytarmalı oldu. Düzdü, hissənin sonuna qədər “Real Sosyedad” daha belə qol vəziyyətləri yarada bilmədi. Fasilədən sonra da oyunun axarı dəyişmədi. “Atletiko” əsasən müdafiə olunur, imkan tapan kimi əks-hücuma çıxırdı. Saatın tamamında Molina fərqi artırmağa çox yaxın oldu. Meydan sahibləri sona 6 dəqiqə qalmış məğlubiyyətdən qurtuldu. Suçiç uzaqdan möhtəşəm zərbə ilə hesabı bərabərləşdirdi. Bu qol baskları ruhlandırdı, Kubo komandasına qələbə qazandıra bilərdi. “Atletiko” cari mövsümdə 5-ci dəfə heç-heçə etdi. Simeonenin komandası “Vilyarreal”a çatsa da, “Barselona”dan artıq 7 xal geri qalır.

“Jirona” – “Atletik” oyununda inanılmaz hadisə yaşandı. Meydan sahiblərinin qapıçısı Qassaniqa üç penalti dəf etdi, düzdü, protokola bunların ikisi yazıldı. 28-ci dəqiqədə qonaqlar penalti qazandı. “Nöqtə”yə yaxınlaşan Berengerin zərbəsinin qarşısını Qassaniqa aldı. 11 dəqiqə sonra Asprilya “Jirona”nı irəli çıxarsa da, Sanset hissənin sonunda hesabı bərabərləşdirdi. 2-ci hissə də maraqlı başladı. 56-cı dəqiqədə “Atletiko” daha bir penalti qazandı, bu dəfə “nöqtə”yə İnyaki Uilyams yaxınlaşdı. Qassaniqa zərbəni dəf etsə də, hakim onun qaydalar çərçivəsində hərəkət etmədiyini bildirib zərbəni təkrarlatdı. İnyakinin uğursuzluğa düçar olduğunu görən Errera penaltini vurdu və argentinalı yenə xilaskar rolunu oynadı. Və taleyin ironiyasına baxın, uzatma dəqiqələrində - hesab 1:1 olarkən “Jirona” penalti qazandı. Zərbəni qola çevirən Stuani komandasına qələbə bəxş etdi. “Atletik” 21-ci əsrdə ilk dəfə çempionat oyununda iki penaltini boşa verdi. Yeri gəlmişkən, La Liqada sonuncu dəfə belə uğursuzluğu “Real” yaşayıb. 2022-ci ildə “Osasuna”nın qonağı olan madridlilərin heyətində Benzema iki penaltini boşa verib. Düzdü, qonaqlar həmin oyunda qələbə qazanıb (3:1).

Turda yeganə qolsuz heç-heçə “Leqanes” – “Valensiya” oyununda qeydə alındı. Komandaların birlikdə “çərçivə”yə cəmi bir zərbə (o da “yarasalar”ın hesabındadı) vurduğunu nəzərə alsaq, belə nəticə qanunauyğundu. Qalan oyunlara gəlincə, “Espanyol” evdə “Malyorka”ya qalib gəldi, “Las Palmas” “Selta” ilə oyunda da qələbə hesabını aça bilmədi. Sevilya derbisində qalib gələn eyniadlı komanda xal hesabında “Betis”ə çatdı. “Xetafe” – “Osasuna” oyununda komandalar hərəyə bir qol vurdu, “Rayo Valyekano” səfərdə “Valyadolid”i məğlub etdi.

9-cu tur
Alaves – Barselona 0:3
Levandovski, 7; 22; 32. (19468)
Barselona: Penya, Balde (De Yonq, 81), Martines (Martin, 81), Kubarsi, Fort (Kunde, 67), Pedri, Kasado, Torres (E.Qarsiya, 6), Rafinya, Yamal (Fati, 67), Levandovski.

Real – Vilyarreal 2:0
Valverde, 14. Vinisius, 73. (73842)
Real: Lunin, Mendi, Rüdiger, Çuameni, Karvaxal, Bellingem, Valverde, Kamavinqa (Militao, 71), Modriç (Vaskes, 90+2), Vinisius (Gülər, 79), Mbappe (Rodriqo, 71).

Real Sosyedad Atletiko 1:1
Suçiç, 84 Alvares, 1. (31983)
Atletiko: Oblak, Lanqle, Ximenes, Vitsel, Qalan (Mandava, 83), Qallaher (De Paul, 64), Koke, Barrios, Molina, Qrizmann (Rikelme, 83), Alvares (Sörlot, 74).

Leqanes Valensiya 0:0
(10958)

Espanyol Malyorka 2:1
Kumbula, 18. Karreras, 47 Railyo, 68. (24434)

Xetafe Osasuna 1:1
Yıldırım, 21 – Budimir, 60. (10670)

Las Palmas – Selta 0:1
İqlesias, 28. (21482)

Valyadolid – Rayo Valyekano 1:2
Amallah, 51 – De Frutos, 57; 80. (21112)

Jirona – Atletik 2:1
Asprilya, 39. Stuani, 90+9 – Sanset, 41. (13396)

Sevilya – Betis 1:0
Lukebakio, 50. (42571)

1. Barselona 9 8 0 1 28-9 24
2. Real 9 6 3 0 19-6 21
3. Atletiko 9 4 5 0 13-5 17
4. Vilyarreal 9 5 2 2 17-17 17
5. Osasuna 9 4 3 2 13-14 15
6. Atletik 9 4 2 3 13-10 14
7. Malyorka 9 4 2 3 9-8 14
8. Rayo Valyekano 9 3 4 2 11-9 13
9. Selta 9 4 1 4 16-15 13
10. Betis 9 3 3 3 8-8 12
11. Jirona 9 3 3 3 11-12 12
12. Sevilya 9 3 3 3 9-10 12
13. Espanyol 9 3 1 5 9-13 10
14. Alaves 9 3 1 5 11-15 10
15. Real Sosyedad 9 2 3 4 7-8 9
15. Xetafe 9 1 5 3 6-7 8
17. Leqanes 9 1 5 3 5-9 8
18. Valensiya 9 1 3 5 5-13 6
19. Valyadolid 9 1 2 6 5-19 5
20. Las Palmas 9 0 3 6 9-17 3

Bombardirlər: Levandovski (Barselona) – 10, A.Peres (Vilyarreal) – 6, Rafinya (Barselona), Mbappe (Real), Lo Çelso (Betis) – 5.

Növbəti turun oyunları 18-21-i aralığında keçiriləcək: Alaves – Valyadolid, Atletik – Espanyol, Osasuna – Betis, Jirona – Real Sosyedad, Selta – Real, Malyorka – Rayo Valyekano, Atletiko – Leqanes, Vilyarreal – Xetafe, Barselona – Sevilya, Valensiya – Las Palmas.

Turun rəqəmi
1000 – “Malyorka”nı məğlub edən “Espanyol” La Liqada qələbə sayını bu həddə çatdırdı. Barselona təmsilçisi İspaniya çempionatında 1000 qələbə həddinə çatan 7-ci klubdu. “Espanyol”a qədər “Sevilya” (1110), “Valensiya” (1284), “Atletik” (1402), “Atletiko” (1402), “Barselona” (1766) və “Real” (1826) da 1000 qələbə qazanıb.

Turun ulduzu
Paulo Qassaniqa (Jirona) – argentinalı qapıçı “Atletik”lə oyunda üç (!) penalti dəf etdi, özü də fərqli oyunçuların vurduğu. Levandovski də “turun ulduzu” olmağa namizəd idi. Sadəcə, polşalı ulduz autsayderlə oyunda het-trik etdi.

Turun sitatı
Robert Levandovski, “Barselona”nın hücumçusu:

Reaksiyalar
Hans-Diter Flik, “Barselona”nın baş məşqçisi:

Karlo Ançelotti, “Real”ın baş məşqçisi:
Faktlar
* “Selta” “Las Palmas”la oyunun 56-cı dəqiqəsində 9 nəfərlə qalsa da, qələbə hesabını qorudu. İspaniya elitasında 1973-cü ildən bəri belə hadisəyə rast gəlinməmişdi.
* Levandovski 30 yaşını tamamlayandan sonra top-liqalarda 184 qol vurub. Polşalı hücumçu bu göstəricidə yalnız Kriştiano Ronaldo ilə İbrahimoviçdən geri qalır.
* “Barselona” son 7 ildə ilk və tarixində 6-cı dəfə 9 turdan sonra ən azı 24 xal toplayıb. Komanda sonuncu dəfə belə nəticə göstərəndə çempion olub.