Çərşənbə axşamı La Liqada 7-ci turun ilk iki oyunu keçirildi.

"Football-plus.az" xəbər verir ki, “Malyorka” “doğma divarlar” arasında qarşılaşdığı “Barselona”nın ardıcıl 6-cı qələbəni qazanmasına imkan vermədi. Xavi “Selta” ilə ağır oyundan sonra sahə oyunçularından beşini dəyişmişdi. Onun komandası “Malyorka” ilə oyuna yaxşı başlasa da, tezliklə təşəbbüsü əldən verdi. Ter Ştegen, Romeu və Martines arasındakı anlaşmazlıq Muriqinin erkən qoluna yol açdı. Üstəlik “qırmızı-qaralar” daha bir neçə təhlükəli hücum qurdu. İlk yarının sonuna yaxın rəqibi meydanın özünə aid hissəsinə sıxışdıran qonaqlar bərabərlik qolunu vurmağı bacardı. Rafinya cərimə meydançası xaricindən zərbə ilə Raykoviçi təslim olmağa məcbur etdi. Amma bu da hissənin son qolu olmadı. Uzatma dəqiqələrində Raykoviç – Muriqi – Prats kombinasiyası “Malyorka”nı oyunda 2-ci dəfə önə çıxardı. Fasilədən sonra da Xavyer Agirrenin komandası ünlü rəqibə layiqincə müqavimət göstərirdi. Feliş meydanı tərk etmək ərəfəsində topu dirəyə vurdu. Qonaqlara 1 xalı sonradan meydana çıxan Yamalın fəallığı qazandırdı. Məhz onun başladığı hücumu Lopes qolla bitirdi. 2:2 hesabı sona qədər dəyişmədi.

“Sevilya”nın baş məşqçisi Xose Luis Mendilibar “Almeriya” ilə oyun ərəfəsində inanılmaz təzyiq altında idi. Buna qədər yalnız bir qələbəsi olan və autsayderlər sırasında qərarlaşan komanda Əndəlüs derbisinə hədsiz aqressiv başladı. İlk 10 dəqiqədən sonra hesab artıq 2:0 idi. Əvvəlcə Badenin tirdən dönən zərbəsinə özünü çatdıran Ən-Nəsiri hesabı açdı. Bir dəqiqə sonra isə yayda alınan Lukebakio cərimə meydançasına daxil olaraq qapıçıya heç bir şans vermədi. “Sevilya” hissənin sonuna qədər 3-cü qolu da vurdu. Susonun uzaq küncə zərbəsi qarşısıalınmaz idi. Faktiki ilk yarıda oyunun taleyi həll olundu. Lamela 51-ci dəqiqədə fərqi darmadağın həddinə çatdırandan sonra meydan sahibləri bir qədər sakitləşdi. Bundan yararlanan “Almeriya” 71-ci dəqiqədə penalti qolu ilə fərqi azaltdı. Təbii ki, hansısa geridönüşdən söhbət gedə bilməzdi. 2-ci uzatma dəqiqəsində Salas qonaqları bir daha mərkəzə dəvət etdi. Mövsüm başlayandan bəri yalnız iki oyunda heç-heçə etməyi bacaran “Almeriya” bu gedişlə çətin ki elitada yerini qoruya.

7-ci tur
Sevilya – Almeriya 5:1
Ən-Nəsiri, 7. Lukebakio, 8. Suso, 38. Lamela, 51. Salas, 90+2 – Suares, 71-p.
Sevilya: Nülann, Pedrosa (Salas, 85), Qudel, Bade, Navas (Xuanlu, 75), Sou (Yanuzay, 65), Fernando, Lukebakio (Sumare, 65), Lamela, Suso, Ən-Nəsiri (Mir, 85).
Malyorka – Barselona 2:2
Muriqi, 8. Prats, 45+3 – Rafinya, 41. Lopes, 75.
Barselona: Ter Ştegen, Balde, Martines (Kunde, 78), Arauxo, Kanselo, Gündoğan, Romeu (Lopes, 65), Qavi, Feliş (Yamal, 65), Rafinya, Torres (Levandovski, 58).
Atletik – Xetafe 2:2
Berçiçe, 6. İ.Uilyams, 62 – Alvares, 51. Latasa, 83.
Vilyarreal – Jirona 1:2
Parexo, 49-p. – Dovbik, 56. E.Qarsiya, 61.
Real – Las-Palmas 2:0
Dias, 45+2. Xoselu, 54.
Valensiya – Real Sosyedad 0:1
Fernandes, 32.
Kadis – Rayo Valyekano 0:0
Xal durumu: Jirona – 19, Real – 18, Barselona - 17, Atletik – 14, Real Sosyedad – 12, Rayo Valyekano – 11, Atletiko, Valensiya - 10, Kadis - 9, Xetafe, Betis – 8, Sevilya, Osasuna, Vilyarreal – 7, Malyorka, Alaves – 6, Las-Palmas – 5, Selta – 4, Qranada – 3, Almeriya – 2.
Bombardirlər: Bellingem (Real), Levandovski (Barselona), Morata (Atletiko) – 5.

Faktlar
* “Barselona” 2010-cu ildən bəri ilk dəfə “Malyorka” ilə oyunda xal itirdi. Balearlılar sonuncu dəfə həmin il oktyabrın 3-də kataloniyalılarla oyunda xal qazanmışdı – 1:1. Həmin vaxtdan bəri keçirilən 11 oyunun hamısında “Barsa” meydandan qalib ayrılmışdı.
* “Barselona” mövsümün əvvəlindən bəri artıq 8 qol buraxıb. Komanda yeni mövsümdə meydana çıxdığı oyunların üçündə qapısına toxunulmaz saxlayıb. Müqayisə üçün deyək ki, kataloniyalılar ötən mövsüm bu qədər qolu 25-ci turdan sonra buraxmışdı.

Oyundan sonra
Xavi Ernandes, “Barselona”nın baş məşqçisi: “Problem ondadı ki, rəqib kobud səhvimizdən sonra hesabda irəli çıxdı. Ən yaxşı oyunumuzu göstərməyə başlayanda isə müdafiə daha bir səhvə yol verdi. Belə səhvlər olmamalıdı. Aşkar qol vəziyyətləri yaratsaq da, iki kobud səhvdən sonra qollar buraxmağımız işləri korladı. Heç-heçə bizim üçün sərfəli nəticə deyil. Düşünürəm ki, hesabı bərabərləşdirəndən sonra oyuna nəzarəti ələ aldıq. Bir-iki təhlükəli vəziyyət də yaratdıq. Ümumilikdə hələ ilk yarıda qələbəni təmin etmək dərəcəsində çoxlu qol imkanımız var idi. Səhvlər üzündən qalib gələ bilmədik. Müdafiədə oyunu yaxşılaşdırmalıyıq. Ötən il müdafiəmiz çox möhkəm idi. Bu gün o qədər pis oynamasaq da, bizə 2 xal itirmək bahasına başa gələn səhvlərə yol verməməliydik”.