Ötən turda “Vilyarreal”la dramatik oyun Xavini çılğınlaşdırdı – “Barselona”nın baş məşqçisi final fitinin ardından yayda klubu tərk edəcəyini bildirdi.

"Football-plus.az" xəbər verir ki, hətta “Barsa” Çempionlar Liqasını qazansa da belə... Ən azı buna görə “göy-narıncılar”ın ortabab “Osasuna” ilə oyunda necə təsir bağışlayacağı maraq doğururdu. “Barselona”dan yalnız qələbə gözləyirdilər. Təşəbbüsü ələ alan kataloniyalılar ilk yarıda Fernandesin qapısı önündə bir neçə təhlükəli vəziyyət yaratsalar da, bunlar əsasən “standartlar”dan sonra olurdu. Meydan sahiblərinin baş məşqçi üçün döyüşdüyü görünürdü: Kanselo epizodların birində üzünün qanını sildi, yəni portuqaliyalı belə inadla müdafiə olunurdu. Ancaq bütün bu canfəşanlıq fasiləyə qədər qol vurmaq üçün kifayət etmədi. “Barsa”ınn böyük üstünlüyü yalnız fasilədən sonra hesabda əksini tapdı. Aydın məsələdi ki, final fiti yaxınlaşdıqca, adətən, müdafiə olunan komandanın gücü tükənir. Nadir hallarda hücumu düşünən “Osasuna” ilk yarıda “çərçivə”yə bir zərbə də vurmadı, oyun vaxtının 30 faizində topa nəzarət etdi. Və “Barsa” istədiyi qolu vurdu! Sonradan meydana çıxan Roke baş zərbəsiylə Kataloniyada qol hesabını açdı. Cəmi 4 dəqiqə sonra Unay Qarsiya “Osasuna”nı azlıqla qoydu. Ancaq pamplonalılar əlini yanına salmadı və bir neçə düşünülmüş hücum qurdu. Belə hücumların birində Raul Qarsiyanın uzaq küncə vurduğu zərbə dirəyə tuş gəldi. Sonluq “Barsa” azarkeşləri üçün həyəcanlı keçsə də, Xavinin komandası vacib qələbəni qorumağı bacardı.

“Atletiko” – “Rayo Valyekano” oyunu ilə bağlı da özünəməxsus intriqa var idi. Birincisi, “arılar”ın avqusta bu rəqibdən aldığı 0:7 hesablı məğlubiyyətin əvəzini çıxmağa çalışacağı şübhə doğurmurdu. İkincisi, “Atletiko”nun heç də optimal olmayan heyətlə necə təsir bağışlayacağı maraqlı idi. Axı Dieqo Simeone tam məntiqli şəkildə “Real”la bazar günü keçiriləcək oyunu nəzərə alaraq rotasiyaya əl atmışdı.

“Metropolitano”dakı duelin ilk yarısı təxminən bərabər səviyyədə keçdi. “Rayo Valyekano” topa nəzarət baxımından azacıq üstün olsa da, meydan sahibləri daha kəskin hücumlar qururdu. Hesab ilk yarının ortalarında açıla bilərdi, sadəcə, Korreanın qolu ofsayd üzündən sayılmadı. Amma fasilə ərəfəsində Rikelmenin cərimə zərbəsindən ötürməsindən yararlanan Mandava “hindular”ı irəli çıxardı. Fasiləyə üstün yollanmaq mümkün olmadı. 42-ci dəqiqədə sol cinahdan sürətli hücum quran qonaqlar Oblakın qoruduğu qapıya yol tapdı.

2-ci hissənin əvvəli də bərabər mübarizə şəraitində keçdi. Ancaq tədricən meydan sahiblərinin üstünlüyü daha aydın nəzərə çarpamağa başladı. Bunda əvəzetmələrin də rolu oldu. Sonda “Atletiko”nun oyunçularının ustalıq səviyyəsi özünü göstərdi. Depayın 81-ci dəqiqədəki qolu ofsayd üzündən sayılmasa da, niderlandlı forvard 10 dəqiqə sonra qaydalar çərçivəsində fərqləndi. “Atletiko” ardıcıl 5-ci qələbəsini qazanmaqla “Barsa”nı 3-cü pillədən sıxışdırdı.

Superkuboka görə təxirə salınan oyunlardan sonuncusu cümə axşamı keçirildi. “Xetafe” ilə səfər oyununa çıxan “Real” “Jirona”ya çatmaq üçün xala ehtiyac duyurdu. Madrid klubunun heyəti ciddi rotasiyaya məruz qalmışdı. Və Karlo Ançelotti heyətlə bağlı yanılmadı. Qonaqlar ilk yarıda “Xetafe”yə təhlükəli vəziyyət yaratmağa imkan vermədi. Meydan sahibləri heç qapıya zərbə də vura bilmədilər. Əvəzində “Real”ın veteranı Xoselu oyunun əvvəlində Vaskesin asmasından sonra hesabı açdı. Xose Bordalasın fasilədə üç oyunçunu dəyişməsi də işə yaramadı. Oyun canlanandan az sonra Xoselu daha bir qol vurdu. Bu qələbə “Real”ı turnir cədvəlinin zirvəsinə qaytardı.

20-ci turdan təxirə salınan oyunlar
Xetafe – Real 0:2
Xoselu, 14; 56. (15264)
Real: Lunin, Mendi, Naço, Rüdiger (Kamavinqa, 46), Vaskes, Modriç, Çuameni, Valverde, Bellingem (Karvaxal, 88), Vinisius (Rodriqo, 75), Xoselu (Dias, 88).
Barselona – Osasuna 1:0
Roke, 63. (37888)
Barselona: Penya, Kanselo, Kubarsi, Kunde, Arauxo, Gündoğan, De Yonq, Pedri (Romeu, 77), Levandovski, Yamal, Torres (Lopes, 7/Roke, 62).
Atletiko – Rayo Valyekano 2:1
Mandava, 35. Depay, 90+1 – Qarsiya, 42. (47003)
Atletiko: Oblak, Mandava, Ermoso, Vitsel, Rikelme (Lino, 58), Lyorente (De Paul, 58), Barrios, Saul (Koke, 70), Vermeren (Molina, 46), Korrea (Qrizmann, 58), Depay.
1. Real – 57, 2. Jirona – 55, 3-4. Atletiko, Barselona – 47... 10. Xetafe – 29, 11-12. Alaves, Osasuna – 26, 13. Rayo Valyekano – 24...
Bombardirlər: Dovbik (Jirona), Mayoral (Xetafe), Bellingem (Real) – 14.

Reaksiya
Karlo Ançelotti, “Real”ın baş məşqçisi (sonda rəqibin cərimə meydançasında Brahim Diasın kobudluğa məruz qalması haqda): “Oyunun sonundakı fol? Bu haqda danışmaq istəmirəm, sadəcə, hakim mənə sarı vərəqə göstərdi. Mənə hakimə dedim ki, Diasın epizodunda penalti təyin olunmalıydı. Yaxşı oynadıq və bunun nəticəsi kimi turnir cədvəlinə başçılıq edirik”.